Dy persona janë arrestuar nga policia e Vlorës, që ka sekuestruar 3 mina me telekomandë. Sipas bluve, minat do të shiteshin nga këta dy persona – që vepronin për llogari të një grupi kriminal, për 10 mijë euro.
Në pranga u vunë Bledar Ukshini, 31 vjeç dhe Ardit Qamluku, 21 vjeç, të dy lindur në Pukë dhe banues në Tiranë. Ata akuzohen për veprën penale “Mbajtja pa leje dhe prodhimi i armëve, armëve shpërthyese dhe municionit”.
Burime zyrtare bënë me dije se aksioni i koduar “Knockout” u krye nga specialistët e Seksionit për Hetimin e Narkotikëve dhe Trafiqeve të Paligjshme në DVP Vlorë, në bashkëpunim me Forcën Operacionale të DVP Vlorë dhe Komisariatin e Policisë Himarë, si rezultat i një hetimi disajavor me metoda proaktive, nën drejtimin e Prokurorisë së Vlorës.
Arrestimi
“Pas lokalizimit dhe prangosjes së këtyre shtetasve, në një lokal, në lagjen ‘28 Nëntori’, shërbimet e Policisë, gjatë kontrollit fizik ndaj tyre, i gjetën 3 mina me telekomandë, të montuara me lëndë të dyshuar eksplozive plastike C4, të lidhura me aparat celular, për t’u komanduar në distancë. Nga veprimet hetimore dyshohet se këta shtetas, në bashkëpunim me njëri-tjetrin, do t’i shisin minat, për llogari të një grupi kriminal, kundrejt çmimit 10 000 euro”, bën me dije policia.
Blutë nuk kanë arritur të ndalojnë blerësit e dyshuar.
Megjithatë, policia shton se “në bashkëpunim me Prokurorinë, po vijojnë hetimet për dokumentimin e plotë të kësaj veprimtarie kriminale dhe për vënien para përgjegjësisë ligjore të personave të tjerë të përfshirë”.
