Një 42-vjeçar shqiptar i cili kërkohej prej drejtësisë italiane pasi akuzohej për dhjetëra grabitje është vënë në pranga pasi është ndalur nga karabinierët në një postbllok rutinor në zonën e Sienës.
Mbi shqiptarin mësohet se rëndonte një vendim për burgosje lidhur me grabitjet e dhunshme që kishte kryer në provincën e Latinas. Ai u ndalua gjatë rrugës për në Poggibonsi, ku postoblloku ishte ngritur për të kontrolluar makinat dhe personat që kalojnë nëpër territorin e zonave urbane të Valdelsës, ku në dhjetor ishin regjistruar një numër i lartë grabitjesh.
Shqiptari i arrestuar ishte në shoqërinë e një bashkëkombësi të tij, gjithashtu i dënuar për vjedhje banesash, kur hasën në patrullën e Karabinierëve të San Gimignano.
Makina tërhoqi menjëherë vëmendjen e ushtarakëve, sepse xhami i pasëm ishte shumë i pluhurosur për rrugët në të cilat udhëtonte. Sipas hetuesve dy shqiptarët po kalonin në këto rrugë pikërisht për t’i shpëtuar kontrolleve të policisë.
Pas një kthese, karabinierët parakaluan dhe urdhëruan ndalimin e dy burrave, duke i nënshtruar kontrolleve. 42-vjeçari u arrestua menjëherë dhe me urdhër të Prokurorisë Publike në Gjykatën e Sienës, u dërgua në burgun e Sienës nga Karabinierët e San Gimignano.
