Ish-agjenti i Forcave Operacionale në Policinë e Shtetit, Jeton Lami ka marrë sot një përgjigje negative nga Gjykata e Lartë, e cila hodhi poshtë rekursin e tij, ku kërkonte një masë më të butë sigurie.
Efektivi që është kapur në kamerat e sigurisë në zonën e Durrësit duke shoqëruar të shumkërkuarin e drejtësisë Ervis Martinaj, 5 ditë parë se ai të zhdukej, do të vijojë kështu të qëndrojë në burg.
Lami ndodhet nën masën e sigurimit personal “arrest me burg”, i akuzuar për shpërdorim detyre pasi ka shoqëruar Martinajn, duke u bërë “truproja” i fundit me uniformë i “mbretit” të lojërave të fatit.
Ende nuk ka një konfirmim nga ana e autoriteteve, nëse shtyrja e këtyre hetimeve ka ardhur si pasojë e ndonjë dëshmie të marrë nga Lami, apo mospranimit të tij për të dëshmuar.
I akuzuar për shpërdorim detyre, Lami asnjëherë nuk ka pranuar të bashkëpunojë me drejtësinë.
Nga hetimet ka rezultuar se në ditët e para të muajit gusht, Lami ka qenë personi që ka shoqëruar të shumëkërkuarin, Ervis Martinaj dhe të dashurën e tij me një automjet “Audi A8” nga Tirana drejt Durrësit dhe anasjelltas.
