Stela Gugallja, në kërkim për dosjen hetimore të inceneratorit të Elbasanit, është lokalizuar në Vjenë. Burime pranë Prokurorisë së Posaçme konfirmuan se prej rreth dy javësh, kanë nisur procedurat për ekstradimin e saj në Shqipëri, ndërsa Gugallja është nën mbikqyrje nga autoritetet austriake.
“Prokuroria e Posaçme është njoftuar se në Gjykatën e Vjenës në Austri, është duke u kryer procedura e ekstradimit të shtetases Stela Gugallja, nga Austria në Shqipëri, në zbatim të urdhrit të kërkimit ndërkombëtar për këtë shtetase. Për këtë qellim, Prokuroria e Posaçme ka përcjellë nëpërmjet Ministrisë së Drejtësisë të gjithë dokumentacionin e nevojshëm për procedurën e ekstradimit. Deri në këtë moment nuk jemi njoftuar nga autoritetet austriake të drejtësisë për ecurinë e mëtejshme të procedurës së ekstradimit”, informoi zyrtarisht SPAK.
Në dhjetor të vitit të kaluar, SPAK njoftoi kalimin për gjykim të dosjes së inceneratorit të Elbasanit. Emri i Stela Gugalljas ishte në listën e të pandehurve. Ajo akuzohet për veprat penale “Korrupsioni aktiv i funksionarëve të lartë shtetërorë ose i të zgjedhurve vendorë”, kryer në bashkëpunim, si dhe “Pastrimi i produkteve të veprës penale apo i veprimtarisë kriminale” , kryer në bashkëpunim.
Stela Gugallja rezulton pronare “me letra” e “Albtek Energy”, kompania koncesionare e inceneratorit të Elbasanit. Sipas akuzës megjithatë, pronarit faktik është Mirel Mërtiri, edhe ky nën akuzë për të njëjtën dosje.
Prokuroria tha se dy kompanitë e inceneratorit të Elbasanit “Albtek Energy” sh.p.k (shoqëria që ka përfituar konçensionin) dhe “Integrated Technology Services” sh.p.k (shoqëria që ka zbatuar punimet për ndërtimin e objektit të konçensionit) kanë paguar rreth 329 milionë lekë (afërsisht 3 milionë euro) fatura për punë të pakryera, skema përmes të cilës dyshohet se ish-ministri i Mjedisit, Lefter Koka ka përfituar paratë e korrupsionit.
“E pandehura Stela Gugallja në cilësinë e ortakut të vetëm dhe administratorit të shoqërisë ‘Albtek Energy’ sh.p.k, i pandehuri Klodian Zoto në cilësinë e ortakut të vetëm dhe administratorit të shoqërisë ‘Integrated Technology Services’ sh.p.k, si dhe i pandehuri Mirel Mërtiri në cilësinë e pronarit faktit të shoqërisë Albtek Energ’ sh.p.k, në bashkëpunim me njëri tjetrin dhe nëbashkëpunim me të pandehurin Lefter Koka, kanë përdorur një skemë fiktive të kryerjes së pagesave, të realizuar nëpërmjet dy shoqërive tregtare respektive, për të mbuluar dhe për të fshehur natyrën e vërtetë të origjinës së paligjshme të shumave monetare, natyrën e vërtetë të transferimit dhe të zhvendosjes së tyre, të cilat në të vërtetë përbëjnë “përftim të parregullt” si rrjedhim edhe produkt të veprës penale të korrupsionit,” shkruhej në njoftimin e prokurorisë.
