Brikena Frakulli, i biri Klevi Banushi dhe Hortenca Biçaku e Artur Kristo u lanë sot në burg nga Gjykata e Tiranës pasi u vunë në pranga dy ditë më parë si anëtar të një grupi kriminal që shpërndante lëndë narkotike të llojit heroinë e kokainë në kryeqytet.
Grupi drejtohej nga 49-vjeçarja, e cila sot mori përsipër të gjithë përgjegjësinë duke thënë se djali i saj Klevi Banushi ndodhej rastësisht në aparatmentin që sipas agjentëve hetimorë përdorej si bazë e grupit dhe ku u gjetën 4 kg heroinë dhe 2 kg kokainë.
Ajo çka bie në sy nga aktiviteti i këtij grupi, sipas një video të siguruar nga TVKlan, është fakti se Brikena Frakulli përveçse nxirrte në terren trafikantët e saj, dilte edhe vetë për të shpërndarë “mallin” tek klientët.
Në një moment të filmuar me kamera amatore anëtarja e grupit Hortenca Biçaku shihet teksa i shet e pashqetësuar një klienti të tyre, një sasi heroine.
Pamjet janë filmuar gjatë shitjes së dozave të drogës në afërsi të Fakultetit të Inxhinierisë.
Siç shihet, takimi mes klientit dhe trafikantes kryehet në rrugël, pasi më herët kanë komunikuar me njëri-tjetrin në celular. Pasi merr dozën e heroinës, klienti largohet, ndërsa trafikantja i drejtohet bazës që ndodhej po në këtë zonë. Ajo është një banesë e përshtatur për të fshehur kokainën dhe heroinën që u sigurohej nga Frakulli.
Ndërkohë në një tjetër video, shihet 49-vjeçarja Frakulli duke takuar një prej klientëve të saj dhe është fiksuar nga agjentët e hetimit të narkotikëve në Policinë e Tiranës, të cilët pas disa javë hetimesh goditën këtë grup kriminal.
Sakaq, policia po i vijon hetimet, pasi ka arritur të bjerë edhe në gjurmët e personit që furnizonte me lëndë narkotike grupin.
