Siguria ushqimore në vendin tonë vijon të mbetet shqetësuese, në një kohë kur produktet që shiten në markete e supermarkete në dhjetëra raste janë konstatuar nga vetë qytetarët se tregtohen jashtë standarteve dhe datës së skadencës.
Autoriteti Kombëtar i Ushqimit duket se nuk bën sa duhet për të kontrolluar produktet që hidhen në treg, ndërsa ushqime të konsumit të përditshëm janë denoncuar në vijueshmëri si të mykur.
Ditën e sotme me anë të një postimi në Facebook, anëtari i Këshillit Kombëtar të PD, Albert Avduli ka denoncuar një tjetër rast kur nënproduktet e qumështit shiten jashtë standarteve.
“Kujdes me ato çfarë konsumoni! Dallohet qartëm afati i skadencës është 04.03.2023. E bleva sot, dt 02.02.2023. Çfarë ka brenda duket qartë”, shkruan Avduli në postim duke lënë të kuptohet se një produkt që ka edhe një muaj afat për t’u konsumuar dhe shitur në treg, është i mykur.
Nuk dihet nëse kosi i deles që sipas ambalazhit është hedhur në treg nga kompania “Erzeni” jashtë çdo standardi nuk është ruajtur në kushtet e duhura, por ai është blerë nga konsumatori, duke vendosur në rrezik jetën e tij.
Pavarësisht se denoncime të tilla janë bërë të shpeshta kryesisht gjatë muajve të verës me kosin me fruta, duket se nuk ka ndonjë masë të marrë qoftë nga institucionet, ashtu edhe nga vetë kompania.
