Detaje të reja janë zbardhur nga aksidenti i ndodhur në mesditë në aksin rrugor Trebinjë-Vërdovë, në zonën malore të Pogradecit.
Ngjarja ka ndodhur në vendin e quajtur ‘Varrezat e Grekut’, ku një mjet tip “Honda” është rrokullisur disa herë përpara se të përfundote rreth 5 metër poshtë rrugës.
Me këtë mjet udhëtonin 6 persona, pjesëtarë të 2 familjeve. Mësohet se katër prej tyre kanë mbetur të plagosur, 2 prej të cilëve pasi kanë marrë ndihmën e parë në spitalin e Pogradecit janë dërguar për mjekim më të specializuar në spitalin e Traumës, në kryeqytet.
Bëhet me dije se 4 të plagosurit janë jashtë rrezikut për jetën. Pjesëtarët e 2 familjeve kishin qenë për fundjavë pranë familjeve të tyre në fshatin Pleshisht dhe po ktheheshin së bashku drejt Tiranës ku edhe banojnë.
Dyshohet se shkak i aksidentit është bërë prania e akullit në këtë segment rrugor.
Kjo ka sjellë humbjen e kontrollit nga ana e drejtuesit të mjetit në një kthesë dhe për pasojë makina ka dalë nga rruga.
Policia në vendngjarje po heton për shkaqet dhe dinamikën e aksidentit.
Sakaq, ky aks rrugor kryesisht në periudhën e dimrit është bërë shkak aksidentesh, kjo edhe prej faktit se rruga ka lartësi dhe pjerrësi të madhe.
