Një ortek gjigand dëbore ka shkaktuar një tragjedi të vërtetë në një vendpushim skijimi Himaljan në Kashmirin e kontrolluar nga India, duke vrarë dy skiatorë polakë dhe duke varrosur 21 të tjerë nën grumbujt e dëborës.
Pamjet tmerruese tregojnë një mur bore që gjëmon nga maja e malit Apharwat dhe lëshohet drejt grupit të skiatorëve, duke bërë që ata të vrapojnë për sigurinë e tyre.
Por gjithsej 21 turistë të huaj dhe dy udhërrëfyesit e tyre nga Kashmiri u kapën nga orteku masiv dhe u varrosën nën dëborë ndërsa po bënin ski në malet pranë qytetit turistik Gulmarg.
“Ekipet e shpëtimit në lartësi të mëdha nxituan në vend me skuter bore dhe morën trupat e dy skiatorëve polakë”, tha oficeri i policisë Amod Nagpuri.
Policia tha se 19 turistë të huaj dhe dy guidat vendase janë shpëtuar, duke shtuar se trupat e dy skiatorëve të vdekur janë transportuar në spital.
“Gjatë operacionit janë shpëtuar 19 shtetas të huaj dhe 2 udhërrëfyes vendas”, thuhet në njoftimin e policisë.
Skiatorët e shpëtuar po trajtohen në një klinikë aty pranë, ndërsa autoritetet ende nuk kanë bërë të ditur kombësinë e tyre.
Ndërkohë, një video tregon ortekun e madh që zbret nga mali drejt grupit të skiatorëve.
