Një 22-vjeçar shqiptar ka përfunduar në telashe me policinë në Itali, pasi në një makinë “Smart” që ai drejtonte është gjetur një sasi droge.
Mësohet se Xhasik Gjoni ishte duke lëvizur me makinë në rrugën Madonna delle Grazie, kur oficerët e policisë së Santa Maria Capua Vetere i bënë shenjë për të ndaluar.
Fakti që kushëriri i tij Osman Gjoni (20 vjeç) kishte drogë në makinë dhe u përballën me policinë, bëri që të dy të tentonin arratisjen, por u kapën menjëherë nga agjentët në terren.
22-vjeçari kishte qenë i arrestuar edhe më 12 janar për posedim droge për qëllime shitje, ndërsa ishte caktuar ndaj tij masa detyrim firmosje.
Ndërkohë, pas kontrollit të makinës dhe dy kushërinjve, 20-vjeçarit i janë gjetur 7 doza hashashi. Sakaq, kontrolli i shtëpisë së Osman Gjonit në rrugën Enaudi, në Curti rezultoi i suksesshëm për efektivët pasi gjetën rreth 680 gram kanabis dhe 13 gramë kokainë.
Në banesë u gjetën gjithashtu materiale për prerjen dhe paketimin e lëndës narkotike. 20-vjeçari shqiptar u arrestua për posedim të paligjshëm të drogës me qëllim tregtimin e drogës.
Zëvendësprokurorja Maria Alessandra Pinto urdhëroi arrest shtëpiak për Osman Gjonin në pritje të seancës së ardhshme.
