Zhdukja e 176 fëmijëve shqiptarë nga hotelet ku ishin vendosur si azilkërkues në Britaninë e Madhe duket se nuk kanë shqetësuar asnjë nga familjarët e tyre në vendlindje, çka hedh dyshime për aktivitetin e tyre.
Asnjë nga prindërit shqiptarë nuk ka ngritur denoncim për zhdukjen e fëmijëve dhe askush s’po kërkon për ta, sipas avokatit Naim Hasani.
Ai tha për FaxNeës se deri më tani autoritetet britanike janë të qeta dhe nuk reagojnë pasi prindërit shqiptarë kanë heshtur.
Sipas avokatit, as shteti shqiptar nuk i është kërkuar të ndërhyjë për të gejtur të miturit e zhdukur.
“Nëse një fëmijë britanik humb në kushte të tilla e gjithë Britania do ndalonte deri sa të gjente atë fëmijë, ndërsa humbja e një fëmije azilkërkues nuk ka të njëjtën rëndësi. Kjo ka qenë dhe arsyeja e debatit të fortë në Parlamentin Britanik. Për sa i përket familjeve nga Shqipëria nuk ka pasur asnjë denoncim prej tyre për fëmijët e humbur. Dyshohet se këto shifra vijnë nga numri i të miturve që vijnë me gomone nga Franca nëpërmjet kanalit të La Manshit për të hyrë ilegalisht në Britani.Duhet të dinë të gjithë ata që vijnë ilegalisht do të kapen herët a vonë. Çdo person shqiptar është i identifikuar dhe do të gjendet”, tha avokati Hasani.
Ministria britanike e emigracionit ka njoftuar se me shumë se 4600 fëmijë të pashoqëruar janë akomoduar në hotele që prej korrikut të vitit 2021. 440 prej tyre janë shpallur të zhdukur, ndërsa ende nuk është zbuluar fati i 200 fëmijëve, mes të cilëve 176 janë shqiptarë.
