Detaje të reja kanë dalë në dritë për ngjarjen e rëndë që ndodhi mesditën e sotme në Fushë-Kosovë. Mësohet se personi që plagosi me armë zjarri nënë e bijë në rrugën “Besa-Besë”, ka ndërruar jetë.
Vdekjen e tij e ka konfirmuar mjeku kujdestar në Klinikën Emergjente të QKUK-së, Ejup Govori, i cili sqaroi se i dyshuari është paraqitur në QKUK në gjendje të rëndë, por nuk ka arritur t’u mbijetojë dy plagëve me armë në bark.
Zëdhënësja e Policisë së Kosovës për rajonin e Prishtinës, Florie Ahmeti, deklaroi për Telegrafin se ka baza të forta dyshimi se ai është vetëplagosur e më pas ka ndërruar jetë në spital.
“Aktualisht përkundër që ka baza të forta dyshimi për vetëplagosje, policia bashkërisht me autoritetet e tjera relevante ligj zbatuese po heton me përpikëri të gjitha rrethanat që karakterizojnë rastin. Ndërkohë që po vazhdon ndërmarrja e veprimeve hetimore e ekzaminuese, i dyshuari është dërguar në QKUK për trajtimin e nevojshëm mjekësor, nga ku rreth orës 18:45 kemi pranuar informatën se personi ka ndërruar jetë”, tha Ahmeti.
Ajo gjithashtu dha detaje të tjera lidhur me rastin.
“Mbështetur në informacionet e pranuara në rrugë operative, policia ka lokalizuar vendndodhjen e të dyshuarit dhe menjëherë ka orientuar veprimet e saja taktike-operative në drejtim të arrestimit të të dyshuarit. Për rrjedhojë, i dyshuari i armatosur, në përpjekje për t’iu shmangur arrestit policor në rrugën “Fehmi Lladrovci” në Fushë Kosovë, ka shtënë me armë zjarri në drejtim të policisë duke rrezikuar drejtpërsëdrejti jetën e policëve si dhe qytetarëve përreth, dhe me këtë rast ka bërë të domosdoshëm dhe të pashmangshëm ndërmarrjen e të gjitha veprimeve policore në përputhje me autorizimet tyre”.
Më tej zëdhënsja shtoi se dyshohet që autori i ngjarjes të jetë plagosur gjatë shkëmbimit të zjarrit me policinë, ose të ketë kryer vetëvrasje pasi ishte i rrethuar nga oficerët dhe nuk mund të arratisej.
“Ndërkaq që sulmi ndaj policisë është neutralizuar i dyshuari në përpjekje e sipër për t’iu shmangur arrestit policor, në rrethana që aktualisht po trajtohen ka marrë plagë nga shkrepja e armës së zjarrit”, shtoi Ahmeti.
Sakaq, edhe gjëndja e dy të plagosurave prej tij paraqitet e rëndë. Govori tregoi për mediat vendase se pacientja 64-vjeçare për momentin është në sallë dhe po i nënshtrohet një ndërhyrjeje kirurgjikale.
Ai po ashtu tregoi se vajza e saj është në emergjencë, duke vijuar me ekzaminimet.
“Gjendja shëndetësore e grave të plagosura ishte stabile por lëndimet janë serioze. Njëra paciente e cila është e vitit 1959 është transferuar në sallë të operacionit për intervenim kirurgjik nga kirurgu abdominal dhe ortopedi, d.m.th në bark dhe në ekstremitete. Ndërsa, pacientja tjetër është stabile, mirëpo është ende duke qëndruar në emergjencë dhe janë duke u kryer konsultat e mëtutjeshme”, ka thënë Govori.
Ndërkohë, dëshmitarët kanë treguar se nënë e bijë ishin brenda makinës kur u qëlluan me armë zjarri nga një burrë. Të dyja u gjetën me plagë të shumta në trup dhe u dërguan në spital.
“Vajza ka ardh pa frymë në banesë dhe më tregoi se i ka parë dy gra të shtrira në tokë. Pastaj kur kemi dal e kemi pa që në vendin e ngjarjes kanë ardh policia dhe autoambulanca”, tha një dëshmitare për KlanKosova.
Paraprakisht dyshohet se incidenti ka ndodhur për shkak të një mosmarrëveshjeje pronësie.
