Një 35-vjeçar është arrestuar në kryeqytet pasi akuzohet për një aksident të ndodhur në rrugën “Demokracia”.
Teksa drejtonte një motomjet ai ka përplasur një vajzë 9-vjeçare, e cila është trajtuar me ndihmë mjekësore dhe ndodhet jashtë rrezikut për jetën.
Por, i riu u largua nga vendngjarja menjëherë pas aksidentit dhe tashmë mbi të rëndon edhe akuza për “largim nga vendi i aksidentit”.
Njoftimi i policisë:
Specialistët e Qarkullimit Rrugor bënë arrestimin në flagrancë të shtetasit G. M., 35 vjeç, për veprat penale “Shkelja e rregullave të qarkullimit rrugor” dhe “Largimi nga vendi i aksidentit” pasi në rrugën “Demokracia”, ka aksidentuar një të mitur 9-vjeçare, dhe më pas është larguar nga vendi i ngjarjes. 9-vjeçarja ndodhet në spital, jashtë rrezikut për jetën.
Shërbimet e Policisë Rrugore të Tiranës, pas marrjes së njoftimit, menjëherë organizuan punën për identifikimin dhe kapjen e autorit të dyshuar. Pas disa orësh pune intensive hetimore profesionale bënë të mundur identifikimin e targës së motomjetit dhe më pas të drejtuesit të tij.
Në cilësinë e provës materiale, u sekuestrua motomjeti.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale.
