Me 56.45% të votave ish-gjenerali i NATO-s, Petr Pavel ka fituar zgjedhjet presidenciale në Republikën Çeke duke mposhtur ish-kryeministrin e vendit Andrej Babish, i cili ka marrë 43.54% të votave.
Në raundin e parë të zgjedhjeve, rezultati mes tyre ishte i ngushtë, të dy fituan rreth 35 për qind të votave
Rezultatet preliminare të zgjedhjeve presidenciale sipas Zyrës çeke të Statistikave tregojnë se me rreth 80 për qind të votave të numëruara, do të jetë pikërisht Pavel kreu i ri i shtetit.
Populli çek votoi sot për të zgjedhur pasuesin e presidentit aktual, Milos Zeman, mandati i dytë i të cilit përfundon në mars.
Qendrat e votimit u hapën të premten në orën 14:00 dhe u mbyllën sot në të njëjtën orë, ndërsa të drejtë vote kishin 8.3 milionë banorë.
Në Republikën Çeke, roli i presidentit është ceremonial, mirëpo ai i jep mandat qeverisë dhe është komandant i përgjithshëm i Forcave të Armatosura.
Pavel e dominoi fushatën e këtyre zgjedhjeve me pikëpamjet e tij mbi luftën e Rusisë në Ukrainë.
Teksa Babish ka tentuar të portretizojë kundërshtarin e tij si luftënxitës dhe ka bërë thirrje për organizimin e një konference të paqes në Pragë, Pavel është shprehur në favor të dërgimit të ndihmës në Kiev.
