Mediat italiane kanë zbardhur sot detaje të reja mbi operacionin me 43 të arrestuar që u finalizua ditën e djeshme nga Guardia di Finanza e Bergamos dhe SPAK, ku edhe u sekuestruan mbi 4 milionë euro të ardhura nga trafiku i drogës.
Sipas tyre mes 43 të arrestuarve gjatë një hetimi ku u përfshinë edhe Eurojust e Europol, pasi ngarkesat me kokainë dhe heroinë vinin kryesisht nga Holanda, rezultojnë të jenë edhe 4 vëllezër me banim në Palazzolo sull’Oglio të Breshias.
Emirjan Beu, Gernard Beu, Dorian Beu dhe Qamil Beu u vunë në pranga pas një hetimi që nisi 6 vite më parë, pasi një çantë shpine me 2 kilogramë kokainë u hodh nga një makinë që lëvizte në autostradë për t’i shpëtuar autoriteteve, por u ndalua më pas dhe pasagjerët u prangosën.
Gernard Beu alias (Gernard Liço/ Gernard Ago) dhe Emirjan Beu nga Durrësi në deklaratën e Guardia di Finanzias cilësohen edhe si dy nga tre krerët e bandës që drejtonin grupin kriminal të trafikut të drogës me Italisë dhe Shqipërisë së bashku me Braniol Liçon.
Ndërkohë numri i përgjithshëm i të hetuarve për këtë dosje është 119 persona dhe pjesa e fundit e aksionit ndodhi të enjten në agim me bastisjen në të cilën 43 personat e fundit nën hetim përfunduan në pranga dhe u sekuestruan pasuri me vlerë 4,068,340 euro.
Grupit në fjalë, në vitin 2017 i janë zbuluar edhe dy laboratorë ku përpunohej kokaina dhe heroina, të vendosur në Kremone dhe Milano.
Sipas dosjes rezulton se droga vinte e pastër nga Shqipëria ose Holanda dhe më pas pritej, përzihej e ndahej për t’u shpërndarë në veri të Italisë, në zona si Torino, Milano e Bergamo.
Lënda më pas shitej edhe në zonën e Brescias nëpërmjet grupit kriminal të përbërë nga katër vëllezërit Beu.
Për të fshehur substancat, anëtarët e grupit përdornin vende të krijuara posaçërisht në makinat me motor të madh, në harqet e rrotave ose pas targës. Gjithashtu kishte një vend të përgatitur enkas që aktivizohej vetëm me përdorimin e një magneti.
Lidhja kriminale është konstatuar vetëm për degën shqiptare. Në total u sekuestruan 120 kilogramë kokainë dhe 15 heroinë shumë të pastër, 92 kilogramë hashash dhe 129 kilogramë marijuanë.
