Një 38-vjeçar shqiptar që ishte shpallur në kërkim nga autoritetet greke pasi akuzohet për vrasjen e një 47-vjeçari (i njohur si amerikani) në zonën e Kallamatës, është arrestuar teksa fshihej në një banesë turistike të marrë me qira, në zonën e Akrogialit, pranë fshatit Kitries.
Mediat greke raportojnë se banesa ishte marrë me qira nga një shtetas bullgar, i cili u arrestua së bashku me shqiptarin pasi akuzohet se strehonte një kriminel.
38-vjeçari në të njëjtën zonë kishte lënë edhe makinën që drejtonte ditën e vrasjes së 47-vjeçarit, me të cilin dyshohet se ka pasur një mosmarrëveshje.
Sipas rindërtimit të ngjarjes rezulton se 38-vjeçari shqiptar është arratisur fillimisht në drejtim të kafenesë së njërit prej dy grekëve që tashmë janë arrestuar për strehim të një krimineli. Nga dyqani, ai grumbulloi ushqime dhe rroba, duke ikur më pas në këmbë drejt malit.
Për momentin nuk dihet nëse shqiptari ka dashur të vriste 47-vjeçarin apo e ka qëlluar në këmbë për shkak të kanosjes dhe plumbi ka goditur një arterie qendrore duke i shkaktuar gjakderdhje të madhe, megjithatë prokuroria i referohet ngjarjes si vrasje.
Sakaq ai së bashku me bullgarin që e shoqëronte u dërguan në Prokurorinë Penale të Kalamatës, e cila e ka proceduar penalisht 38-vjeçarin për vrasje me dashje, ndërsa një 22-vjeçar i arrestuar ditën e vrasjes dhe i cili ka pranuar se ka joshur viktimën të dilte nga shtëpia për t’i takuar, akuzohet për bashkëpunim në krim.
