“E mbaj unë burgun!”. Këto janë të vetmet fjalë që Fredi Krasniqi, i arrestuar pas zbulimit të një “shtëpie bari” në Shijak, ka thënë para togave të zeza në seancën gjyqësore të zhvilluar sot në Gjykatën e Durrësit.
Duke refuzuar të flasë më tepër para autoriteteve, 46-vjeçari ka lënë të kuptohet se nuk ka ndërmend të dorëzojë vëllain e tij Selman Krasniqi (i shpallur në kërkim) dhe anëtarët e tjerë të grupit që kishin shndërruar dy katet e fundit të vilës 4-katëshe në fermë kanabisi.
E teksa për Fredi Krasniqin është vendosur masa e sigurisë “arrest në burg”, për vallin e tij Selmanin, autoritetet shqiptare do t’i kërkojnë atyre italiane vendndodhjen dhe arrestimin e tij.
Sipas sistemit TIMS, 43-vjeçari rezulton të jetë në Itali, por policia dyshon se përveç tij në këtë aktivitet të paligjshëm janë të përfshirë edhe persona të tjerë që me gjasë kanë lidhje me grupet kriminale të zonës.
Sakaq, aktiviteti i ngritur nga dy vëllezërit rezulton se është ngritur kohëve të fundit, me energjinë që sigurohej direkt nga kabina elektrike që ndodhej larg shtëpisë.
Për këtë arsye është hapur një kanal për të mbuluar linjën, duke bërë që të implikohen edhe persona të tjerë. Sa i përket energjisë elektrike në banesë ajo ishte normale dhe paguheshin faturat normalisht.
Ndërkohë, në vilën 4 katëshe në fshatin Sallmone u sekuestruan nga policia 444 rrënjë kanabis, si edhe një arsenal armësh që dyshohet se përdoreshin nga grupet kriminale.
Në banesë janë gjetur 10 kallashnikovë, 1 pushkë, 1 automatik dhe granata, të cilat i janë dërguar laboratorit të kriminalistikës për të zbuluar nëse janë përdorur në ngjarje kriminale.
Njoftimi i policisë:
Në zbatim të planit të masave, të hartuar nga Policia e Shtetit, me fokus mbajtjen nën kontroll të situatës kriminale, parandalimin, evidentimin dhe goditjen e veprimtarive kriminale të armëmbajtjes pa leje dhe të kultivimit të bimëve narkotike, në ambiente të mbyllura, me anë të llambave dhe në terrene të hapura, strukturat e Drejtorisë Vendore të Policisë Durrës kanë zhvilluar operacione kontrolli, në terren, me qëllim evidentimin dhe goditjen e paligjshmërive.
Në përmbushje të detyrave të përcaktuara në këtë plan masash dhe në vijim të operacioneve të njëpasnjëshme, të zhvilluara më parë, bazuar në inteligjencën informative, se në një ambient (banesë), në fshatin Sallmone, Shijak, dyshohej se kultivoheshin bimë narkotike me anë të llambave dhe se mbahej i fshehur një arsenal armësh, i poseduar nga grupe kriminale, shërbimet e Drejtorisë Vendore të Policisë Durrës, në bashkëpunim me ato të Komisariatit të Policisë Shijak, nën drejtimin e Prokurorisë pranë Gjykatës së Rrethit Gjyqësor Durrës, pas një hetimi me metoda proaktive, kanë organizuar dhe finalizuar megaoperacionin policor të koduar “Krahët e krimit”.
Si rezultat i këtij megaoperacioni, në fshatin Sallmone, u zbulua ambient (banesë 4-katëshe) i dyshuar në pronësi të vëllezërve F. K. dhe S. K.
Shërbimet e Policisë kanë konstatuar se kati i tretë dhe i katërt i kësaj banese, ishin përshtatur për kultivimin e bimëve narkotike, me anë të llambave. Gjatë kontrollit në këto dy kate, u gjetën dhe u sekuestruan 444 bimë narkotike kanabis, 222 llamba elektrike dhe pajisje të tjera që shërbenin për kultivimin e bimëve narkotike.
Gjithashtu, në vijim të megaoperacionit policor të koduar “Krahët e krimit”, bazuar në inteligjencën informative, se në këtë banesë mbahej i fshehur edhe një arsenal armësh, është ushtruar kontroll i imtësishëm në të gjitha ambientet e kësaj banese.
Si rezultat, në një ambient me mur të dyfishtë, në këtë banesë, është gjetur i fshehur një arsenal armësh, i përbërë nga 10 kallashnikovë, 1 pushkë, 1 automatik shars, granata dore, një hark luftarak, një jelek antiplumb, një palë dylbi dhe municion luftarak që u sekuestruan në cilësinë e provës materiale.
Në vijim të veprimeve procedurale për këtë rast, u arrestua në flagrancë shtetasi F. K., 46 vjeç, banues në Sallmone, Shijak, si dhe u shpall në kërkim vëllai i tij, shtetasi S. K., 43 vjeç, shtetas me precedent të mëparshëm kriminal në fushën e armëmbajtes pa leje. Vijon intensivisht puna për kapjen e tij.
Nga hetimet e kryera deri tani, si dhe bazuar në inteligjencën informative, dyshohet se armët e gjetura në këtë ambient (banesë), mund të jenë fshehur nga pjesëtarë të grupeve kriminale.
Armët e sekuestruara do të dërgohen në Institutin e Policisë Shkencore, për të përcaktuar nëse janë përdorur për ngjarje kriminale të ndodhura më parë.
Po nga hetimet, dyshohet se edhe kultivimi i bimëve narkotike mund të jetë financuar nga pjesëtarë të grupeve kriminale.
Strukturat hetimore të Drejtorisë Vendore të Policisë Durrës, në bashkëpunim të ngushtë me Prokurorinë pranë Gjykatës së Rrethit Gjyqësor Durrës, vijojnë veprimet e thelluara hetimore, për të dokumentuar me prova ligjore, autorësinë e vërtetë të pronësisë dhe të posedimit të armëve të zjarrit, si dhe të financimit të kultivimit të bimëve narkotike, me qëllim kapjen dhe nxjerrjen e autorëve përpara përgjegjësisë penale.
