Një qendër të moshuarish në Kavajë është përfshirë nga flakët mesditën e sotme.
“Më datë 23.01.2023, dyshohet se aksidentalisht ka rënë zjarr në një qendër për të moshuar. Si pasojë është dëmtuar lehtë një e moshuar që qëndron në këtë qendër”, njofton policia.
Zjarri ka rënë si pasojë e një defekti elektrik në dhomën e një të moshuare ku ishin të pranishëm dy persona.
Mësohet se kanë marrë flakë orenditë, të cilat kanë shkaktuar përhapjen e shpejtë të zjarrit.
E moshuara që është lënduar ka qenë e paralizuar dhe fatmirësisht si pasojë e ndërhyrjes në kohë të stafit është nxjerrë nga dhoma dhe është transportuar për në QSUT.
Sakaq, zjarri është shuar pas ndërhyrjes së shërbimeve zjarrfikëse, ndërsa grupi hetimor ndodhet në vendngjarje dhe po punon për zbardhjen e plotë të rrethanave të ngjarjes.
