Kushtetuesja vendos kundër PD-së për dy paditë e depozituara që kërkonin shkarkimin e Olta Xhaçkës si deputete, por pranon kërkesën për rikthimin e çështjes në Kuvend, duke e detyruar institucionin që ta depozitojë sërish në këtë gjykatë.
Këtë të Hënë, Kushtetuesja njoftoi se ka vendosur me shumicë votash që gjykimi për shkarkimin e Xhaçkës duhet të pushohet, me argumentin se për këtë çështje do të duhet të shprehet më parë Kuvendi i Republikës së Shqipërisë.
“Për kërkimin e dytë, sipas objektit të kërkesës, që lidhet me konstatimin e papajtueshmërisë në ushtrimin e mandatit të deputetes Olta Xhaçka, gjykimi i çështjes duhet të pushohet, pasi për këtë kërkim do të duhet të shprehet më parë Kuvendi i Republikës së Shqipërisë”, thuhet në njoftimin e Gjykatës Kushtetuese.
Po ashtu, Kushtetuesja e rikthen çështjen në Kuvend, duke vlerësuar se është ky institucioni që duhet të bëjë detyrimisht kërkesë për konstatimin e pavlefshmërisë së mandatit të Xhaçkës.
Përfaqësuesi ligjor i grupit “Alibeaj”, Marash Logu, u shpreh se vendimi i sotëm “është një lajm i mirë se Shqipëria nuk do të bëhet vendi i parë në botë, ku deputetët dhe ministrat shpallen investitorë strategjikë”.
“Gjykata Kushtetuese vendosi pranimin e kërkesës së Grupit Parlamentar të Partisë Demokratike (1/10 së deputetëve), duke shpallur antikushtetuese mbrojtjen politike që mazhoranca synoi t’i bënte deputetes dhe ministres së saj. Tashmë Kuvendi është i detyruar që t’ia dërgojë çështjen Gjykatës Kushtetuese, ku me fakte e argumente do të provohet se Olta Xhaçka, në kundërshtim flagrant me Kushtetutën dhe ligjin, ka përfituar nga pasuria publike”, shkruan ai në një postim në FB.
Më 18 Janar, Gjykata Kushtetuese shqyrtoi dy kërkesat nga deputetët demokratë lidhur me çështjen e vlefshmërisë së mandatit të deputetes Olta Xhaçka.
Njëra kërkesë u paraqit nga grupimi “Alibeaj” dhe tjetra nga PD e drejtuar nga Sali Berisha. Në thelb të dyja kërkesat argumentonin se, Xhaçkës duhet t’i hiqet mandati, pasi bashkëshorti i saj, Artan Gaçi, ka marrë përfitime mbi pasuri shtetërore. Një kompani e tij, e cila do të ndërtojë një hotel në zonën e Dhërmiut, në një pronësi tërësisht private, ka fituar statusin e investitorit strategjik e për pasojë edhe të drejtën e shfrytëzimit të një sipërfaqe plazhi në bregdetin e jugut. Sipas kërkesave, përfitimet e Gaçit konsiderohen si përfitime dhe të vetë ministres.
Përfaqësuesit ligjorë të Xhaçkës, argumentuan se ky status “nuk nënkupton ushtrimin e ndonjë veprimtarie fitimprurëse me organet e pushtetit qëndror dhe vendor, por vetëm asistencë administrative gjatë fazave të zhvillimit të projektit, asistencë kjo në kuptimin e mbikëqyrjes dhe ndihmës në kryerjen procedurave të ndryshme administrative gjatë fazave të zhvillimit të projektit”.
Gjithçka lidhet me një vendim të 29 marsit 2021, të Komitetit të Investimeve Strategjike, një strukturë qeveritare e drejtuar nga kryeministri, për t’i dhënë statusin e investitorit strategjik kompanisë “AG.TCC” shpk, në pronësi të bashkëshortit të Xhaçkës, sipërmarrësit Artan Gaçi. Kompania e përfitoi statusin pasi paraqiti projektin për ndërtimin e një hoteli disa katësh, me 5 yje, në bregdetin e Dhërmiut, me një vlerë prej 5.5 milionë eurosh.
Tre muaj më vonë, më 25 qershor 2021 një shtetase amerikane Tawni Lin Grzych-Sutton, 31 vjeç, banuese në Tiranë krijon shoqërinë “AGTCC Hotel Management”, shpk, me objekt veprimtarie “shërbim hoteleri turizëm”. Ndërsa 5 ditë më vonë, kjo kompani lidh një marrëveshje bashkëpunimi me kompaninë e Gaçit “AG.TCC” shpk, sipas së cilës administrimi i të gjitha përfitimeve nga statusi i investitorit strategjik, i kalon kompanisë së Sutton, e cila rezulton të jetë bashkëjetuesja e vëllait të ministres. Kjo marrëveshje, reflektohet më 15 korrik 2021 në një tjetër vendim të Komitetit të Investimeve strategjike, duke e konsideruar ndër të tjera shoqërinë “AGTCC Hotel Management”, shpk, si “brand ndërkombëtar”. Më 2 mars 2022, qeveria miraton vendimin me anë të të cilit i njeh të drejtën e përdorimit të brigjeve dhe zonës përkatëse të plazhit përballë kompleksit të hotelit shoqërisë “AGTCC Hotel Management”, në emër të Sutton.
Të dy grupimet e deputetëve demokratë e cilësuan çështjen si një gur prove për paanësinë e Gjykatës Kushtetuese.
Deputeti Gazmend Bardhi shkroi përpara fillimit të seancës në FB se “vetëm në regjimin e korruptuar të Edi Ramës ndodh që një ministre/deputete të jetë edhe investitore strategjike. E sotmja është një gur prove nëse Gjykata Kushtetuese është garante e Kushtetutës, apo është garante e regjimit të korruptuar të Edi Ramës”.
Ndërsa pas përfundimit të seancës për kërkesën e paraqitur prej tyre, deputeti Agron Shehaj tha se “ne besojmë se Gjykata Kushtetuese, ka krijuar një precedent, standard, atë që të heqë mandatin e deputetëve nëse këta përfitojnë nga prona publike. Jemi të bindur që ka vetëm një mundësi përballë këtij abuzimi dhe akti korruptiv, përndryshe do të ishte realisht një dëm shumë i madh për besueshmërinë e kësaj gjykate nëse me vendimin e saj do ta nxirrte të larë deputeten Xhaçka”.
