Familjarët e Saimir Sulës kanë zhvilluar ditën e sotme një protestë para Ministrisë së Drejtësisë.
Familja Sula dhe në veçanti motra e të riut shqiptar Saimir Sula, trupi i të cilit erdhi i pajetë dhe pa zemër nga Spanja, ku shkoi në një spital për t’u kuruar pasi u infektua me Covid19, kanë protestuar sërish sot përpara Ministrisë së Drejtësisë.
Së bashku me ta dhjetëra familjarë dhe qytetarë u janë bashkuar thirrjeve të Majlinda Sulës për të gjetur drejtësi për vëllain e saj.
Në protestën e sotme Majlinda dhe të tjerët kanë kërkuar realizimin e analizave të ADN-së për zemrën që autoritetet spanjolle i kanë dorëzuar pak muaj më parë autoriteve shqiptare me pretendimin se i përket Saimir Sulës.
Majlinda Sula u ka bërë thirrje ministrit të Drejtësisë Ulsi Manja dhe kryeministrit Edi Rama që të japin OK për realizimin e ADN-së së organit jetësor. Motra e të ndjerit kërkon që zemra të sillet në Shqipëri dhe që ADN-ja të bëhet edhe në vendin tonë, në institucionet publike e private, për të bindur familjarët.
Ajo është shprehur se dyshon që vëllai i saj u vra në spitalin spanjoll dhe konfirmon se protestat do t’i vijojnë në Bruksel.
“Heshtja e institucioneve flet shumë. Jam e bindur se Saimiri u vra në spital në Barcelonë. Kërkojmë të bëhet ADN-ja, kemi dyshime. Vëllait tim i kanë hequr zemrën, ne do të protestojmë edhe në Bruksel”, tha ajo.
Motra e Sulës thotë se është ‘përcjellë’ nga institucionet shqiptare dhe i kanë bërë bllok në celularë si dhe nuk i lënë takime. Ajo shton më tej se nga kjo heshtje i lind e drejta të mendojë se mes Shqipërisë e Spanjës është bërë një marrëveshje për të arkivuar këtë çështje.
Madje duke krahasuar historinë e saj me atë të përplasjes së Mihal Kokëdhimës më turistët spanjollë, Majlinda Sula nënvizon se qeveria ashtu siç bëri drejtësi në atë rast duke shembur restorantin dhe burgosur dhunuesin, duhet që të mos heshtë edhe për vëllanë e saj, port ë zbarhë ngjarjen.
Pjesë nga prononcimi i saj:
Zoti kryeministër, ky është një artikull në gazetën më të madhe spanjolle. Është El Mundo, në gusht ka shkruar për Mihal Kokëdhimën. Kokëdhima trembi y turistë spanjollë dhe shteti u ngrit në këmbë, u ngrit dhe kërkoi drejtësi. Ju nuk vonuat as tre ditë dhe bëtë çfarë ju kërkuan, Ju Mihalin e burgosët, i shembët restorantin dhe e mbyllët për tre vite në burg. Saimiri erdhi pa zemër zoti Rama, i shkulën zemrën dhe ju heshtni. Ju heshtni dhe kjo gjë më lë të kuptoj shumë gjëra.
Ne jemi të bindur që Saimiri u vra në spital në Barcelonë. Saimiri me telefoni dhe më tha, ‘Majlind hajde më merr se po më vrasin’. Kur unë mbërrita kishin kryer punë, e kishin vrarë. Kam një telefonatë zoti Rama, kam një telefonat në tru. Çdo mëngjes dhe çdo darkë unë kam këtë telefonatë në tru. “Majlind hajde se po më vrasin”.
