Alarmi për bombë në bordin e një avioni Boeing të “Ryanair” që ishte nisur nga Katovica e Polonisë me 192 pasagjerë në bord dhe kishte për destinacion Athinën, ka tronditur mbrëmjen e sotme Greqinë.
Të gjithë ishin të shqetësuar për fatin e udhëtarëve, teksa ushtria greke autorizoi një avion luftarak F-16 për ngritje në ajër, i cili e monitoroi avionin e pasagjerëve deri në momentin e uljes.
Sipas mediave greke që i referohen burimeve nga aeroporti, në orën 19:20 kanë përfunduar me sukses kontrollet në avion. Në vendngjarje kanë shkuar forca të zjarrfikëses, një departament special i TEEM dhe forca të shumta policie.
Lidhur me ngjarjen, Shtabi i Policisë Helenike ka lëshuar edhe një njoftim përkatës ku thuhet se “në kuadër të hetimit të informacionit, në lidhje me ekzistencën e një mjeti shpërthyes në një avion të një kompanie që po kryente fluturim nga një vend i huaj për në Athinë, avioni , pas një vendimi të Komitetit të Sigurisë së Aeroportit, i shoqëruar me avionë luftarakë, u ul i sigurt pasditen e sotme (22-01-2023) në Aeroportin Ndërkombëtar të Athinës. Më pas është bërë kontroll tek të gjithë pasagjerët, si dhe në avion, nga shërbimet kompetente të Policisë Greke, pa dalë ndonjë gjë e dyshimtë”.
Sakaq, pasagjerët në avion dhe të afërmit e tyre që pritën me zemër të ngrirë jashtë pistës rrëfyen për mediat momentet e ankthit që përjetuan.
Ata kanë treguar se askush nuk e dinte se çfarë po ndodhte deri në momentin kur panë zjarrfikëset në pistën e aeroportit “Eleftherios Venizelos” dhe kuptuan se diçka nuk shkonte.
“Nuk kishim asnjë informacion, vetëm kur zbritëm pamë zjarrfikëset në pistë. Na çuan në një korridor tjetër dhe jo në atë ku zakonisht shkojmë për të zbritur. U prit rreth një orë dhe ne qëndruam brenda në avion. Pasagjerët dolën gradualisht 60, 60”, tha një pasagjer duke folur për neësit.gr.
“Pas kësaj erdhën disa qen dhe filluan të nuhasin bagazhet. Ne nuk i pamë F16-të. Na kishin bashkuar të gjithëve dhe kaluam kontrollin e bagazheve me makineri speciale. Ne i çuam bagazhet në pistë. Kur hapëm celularët, mësuam se çfarë po ndodhte nga të afërmit tanë. Nuk kishte asnjë informacion”, shtoi ai.
Ndërkohë, një nënë e cila nxitoi drejt aeroportit “Eleftherios Venizelos” pas lajmit për ekzistencën e një bombe, foli për mënyrën sesi i biri e përjetoi ngjarjen.
“Atyre nuk u është thënë asgjë për të ruajtur sigurinë. Nuk u thanë për një bombë, por e lexuan. Nga dritaret, djali im nuk i pa F16-at . Ata qëndruan në aeroplan për një orë kur arritën në “Eleftherios Venizelos” dhe më pas i pritëm të dilnin. Duhej të zbrisnin një nga një dhe t’i kontrollonin, pastaj të shihnin bagazhet”, rrëfeu ajo.
