Një 52-vjeçar është gjetur i pajetë në Elbasan dhe sipas policise, dyshohet se ka rene aksidentalisht nga nje lartesi.
Familja e 52-vjeçarit Gjina Biba, i cili u gjet i pajetë në vendin e njohur si “Gurorja” në fshatin Letan kanë hedhur dyshime të forta se vdekja e tij nuk është aksidentale.
Ngjarja u raportua nga policia ditën e sotme duke njoftuar se Biba ka rënë nga lartësia, ç’ka i ka shkaktuar vdekjen.
“Rreth orës 10:30, në fshatin Letan, në vendin e quajtur “Gurrorja”, është gjetur i pajetë shtetasi Gj. B., 52 vjeç, banues në Tiranë. Paraprakisht, dyshohet se 52-vjeçari ka rënë aksidentalisht nga lartësia dhe për pasojë, ka humbur jetën”, njoftoi policia.
Por vëllai i viktimës, Viktor Biba është shprehur për mediat se ai është masakruar nga punonjësit e gurores dhe më pas është hedhur nga lartësia.
Ai hodhi poshtë pretendimet se i vëllai ishte i alkoolizuar, duke thënë se nuk e tepronte me pijen. Ai gjithashtu ka deklaruar se do të hedhë në gjyq punonjësit e gurores.
“Na kanë thënë tek puna se kishte ardhur në shtëpi por kur shkuam në shtëpi nuk e gjetëm. Është gjetur 200 metra larg vendit të punës, i masakruar. Këtë e kanë bërë vetëm punonjësit që kanë punuar me të të cilët do t’i hedh në gjyq. Këtu është bërë një krim sepse ai është masakruar”, u shpreh vëllai i 52-vjeçarit.
Sakaq, sa i përket viktimës, ai banonte në Tiranë dhe punonte në guroren në Elbasan, ku edhe u gjet i vdekur ditën e sotme.
Pas dy ditëve kërkimesh nga të afërmit e tij ai është gjetur i pajetë në afërsi të tunelit të Letanit.
Ndërkohë, grupi hetimor vijon punën për zbardhjen e plotë të rrethanave të këtij rasti.
