Rreth dy muaj më parë trajneri i peshëngritjes, Zef Kovaçi, denoncoi një skandal, që konsistonte në heqjen e emrit të tij nga medalja e artë e Erkand Qerimajt në Kampionatin Europian që u mbajt vitin e kaluar në Tiranë.
Ndonëse për muaj me radhë trajneri kishte heshtur duke shpresuar në zgjidhjen e pretendimit të tij, kjo gjë nuk ndodhi. Më pas trajneri akuzoi publikisht për vjedhje, ndërsa të përfshirë në këtë aferë përmendi vetë sportistin Qerimaj, federatën, Ministrinë e Sportit, por gjithashtu edhe trajnerin Sokol Bishanaku, pasi pikërisht emri i këtij të fundit ishte vendosur në suksesin e Europianit dhe rrjedhimisht Bishanakut i kishin kaluar edhe paratë e shpërblimit (rreth 16 milionë lekë të vjetër).
Por Kovaçi, ashtu sikurse kishte bërë të ditur edhe më parë, ka vendosur që t’i shkojë deri në fund kësaj çështjeje, për të kërkuar të drejtën e tij. Kështu, përveç bërjes publike si rast, trajneri tashmë ka realizuar edhe hapat e parë ligjorë, teksa ka bërë edhe një denoncim në prokurorinë e Tiranës, gjë të cilën e pranon në prononcimin e tij për “Panorama Sport”:
“Ky është një skandal, dhe siç e kam thënë edhe më parë, nuk do të ndalem, por do të luftoj deri në fund. Unë tashmë kam bërë edhe denoncimin në prokurori ndaj Sokol Bishanakut, që është edhe personi, të cilit i kanë kaluar paratë. Kjo është një aferë korruptive, që siç e kam deklaruar, janë të përfshirë sportistë, federata, ministra, por edhe trajneri që është paraqitur në vend të emrit tim. Një vjedhje që i është bërë mundit, djersës dhe karrierës sime.
Ndërsa si fajtor denoncoj tashmë trajnerin Sokol Bishanaku. Emri tij dihet që është vendosur për t’i kaluar lekët, të cilat më pas t’i shkojnë Qerimajt. Në prokurori kam paraqitur të gjithë dokumentacionin që vërteton se deri në ditën e garës më 31 maj kam qenë unë trajneri i Erkand Qerimajt. Për këtë problem kam marrë shumë mesazhe dhe thirrje për të më takuar dhe për të gjetur një zgjidhje, pasi ata kërkonin që unë të ndalesha. Por e përsëris, pas asaj që ndodhi kjo nuk është më çështje lekësh dhe personat përgjegjës duhet të përgjigjen para ligjit.
Kjo është një punë që unë e bëj për dinjitetin dhe emrin tim, por gjithashtu edhe për të gjithë trajnerët, në mënyrë që këta njerëz të maten mirë kur bëjnë të tilla shkelje. Tani jam në pritje të përgjigjes zyrtare nga prokuroria, por theksoj se në rast se gjërat do të zvarriten, unë do t’i drejtohem menjëherë më pas KAS-it në Lozanë”, deklaron trajneri Zef Kovaçi, me karrierë 39-vjeçare në peshëngritje.
