Miliarder amerikan Elon Musk ka lëshuar një seri kritikash të ashpra ndaj Forumit Ekonomik Botëror të mbledhur këto ditë në Davos të Zvicrës.
Në rrjetin social të cilin tashmë ai e zotëron, Musk thotë se liderat e mbledhur në Davos po hiqen si një qeveri botërore e pazgjedhur nga populli.
Në përgjigje të një postimi ku thuhet se një prej organizatorëve kryesorë të këtij Forumi, Klaus Schëab është shprehur se “Metaverse është një ekosistem i sigurtë pasi brenda saj do të jetë edhe Interpoli”, Musk është përgjigjur:
“Forumi Ekonomik Botëror po bëhet një qeveri botërore e pazgjedhur që ne njerëzit as nuk e kërkuam dhe as nuk e duam”.
Elitat politike të botës u mblodhën edhe këtë vit në Davos, për të diskutuar për probleme madhore si lufta në Ukrainë dhe emergjenca e ndryshimeve klimatike. Ata thonë se globalizmi është tashmë në një krizë ekzistenicale, ndaj duhet gjetur një mënyrë për të “bashkëpunuar në një botë të fragmentuar”.
Musk më herët ka zbuluar se ishte i ftuar të merrte pjesë në FEB, por ka vendosur ta refuzojë.
Forumi Ekonomik Botëtëror ka qenë prej vitesh epiqendër e teorive konspirative, mes akuzave se po shtyn axhendën e globalistëve për të vënë në zbatim plane gati-gati apokaliptike si shpopullimi, kontrolli i shtuar ndaj njerëzve, mohimi i të drejtave e të tjera. Me fjalë të tjera, bota sipas Forumit Ekonomik Botëror, në sytë e konspiracionistëve është një distopi e ngjashme me atë të “1984”-ës.
