Fatjon Veizaj, deputet i PD-së në qarkun e Vlorës, ka hequr dorë nga mandati.
Arsyet e dorëheqjes, siç deklaron, lidhen me përçarjen brenda PD-së.
Fatjon Veizaj, i pozicionuar deri më tani krah Enkelejd Alibeajt, shpreh mosdakortësi me vendimin e tij për përjashtimin e katër deputetëve nga grupi parlamentar i PD në Kuvend.
“Duke refuzuar kategorikisht përjashtimet nga njëra anë, por dhe mënyrën e përdorur nga individë të caktuar në kërkim pushteti personal, pa respektuar dinjitetin e deputetëve të zgjedhur dhe me pasojë thellimin e përçarjes nga ana tjetër, kam vendosur të heq dorë nga mandati i deputeti“, thotë Veizaj përmes një reagimi në “FB”
Reagimi
Në postimin në rrjetin sociale, Vezaj shkruan: “Kur pata nderin të zgjidhem deputet i Partisë Demokratike në Qarkun e Vlorës, nuk e kisha menduar kurrë përçarjen e demokratëve. Për fat të keq, prej një viti e gjysëm, Partia Demokratike nuk po ia del t’i japë fund përçarjes. As lidershipi dhe as deputetët e saj nuk po i përgjigjen interesit të demokratëve për ta bërë atë një forcë udhëheqëse, të respektueshme dhe fituese. Vala e re e përjashtimeve në Partinë Demokratike ishte e tepert. Mund të jetë një vendim taktik në funksion të numrave në grup, por vendimi ul edhe me tepër besueshmërinë dhe seriozitetin për të ardhmen grupimit vendimarrës. Kanë plot të drejtë demokratet në zemërimin, zhgënjimin, madje edhe sarkazmën e tyre. Të treja këto ndjesi i kam përjetuar gjatë këtyre diteve. Në këtë kohë të trazuar për Partinë Demokratike, jam përpjekur të mos e ushqej përçarjen, të qendroj pranë zgjedhësve, të respektoj bindjet e tyre, por zhvillimet e fundit kanë treguar se ndarja në Partinë Demokratike është e pakthyeshme”.
Më tej shton: “Duke refuzuar kategorikisht përjashtimet nga njëra anë, por dhe mënyrën e përdorur nga individë të caktuar në kërkim pushteti personal, pa respektuar dinjitetin e deputetëve të zgjedhur dhe me pasojë thellimin e përçarjes nga ana tjetër, kam vendosur të heq dorë nga mandati i deputetit. Detyrën time si opozitar do të vazhdoj ta kryej me kohë të plotë, duke punuar me kandidatët e opozitës për një rezultat sa më të mirë në zgjedhjet lokale! Falenderime për të gjithë ata që më kanë mbështetur në këtë rrugë të pashkelur më parë”.
Deputeti “investitor strategjik”
Në Nëntor 2022, Boldnews ka raportuar se kompania e krijuar nga Fatjon Veizaj dhe tashmë e drejtuar nga nipi i tij, Evis Latifaj, është pjesë e një shoqërie private që ka fituar statusin e “investitorit strategjik” për ndërtimin e një kompleksi turistik me vlerë 210 milionë euro në Gjirin e Lalzit.
Vendimi nga Komiteti i Investimeve Strategjike, i drejtuar nga kryeministri Edi Rama, mban datën 18 Korrik 2022.
Kush e zëvendëson
Sipas listës së kandidateve për deputetë dorëzuar në KQZ nga PD për zgjedhjet parlamentare, mandati i Fatjon Veizajt i kalon Gëzim Ademajt.
Gëzim Ademaj, vjen nga radhët e PDIU-së, parti që deri më tani nuk i është bashkuar opozitës së drejtuar nga PD, në garën për zgjedhjet e ardhshme lokale.
