Çështja barrikadave të ngritura në Veriun e Kosovës nga serbët, që e mbylli vitin 2022 plot tension dhe deklarata të ashpra ka marrë vëmendjen e mediave ndërkombëtare.
Së fundmi, kryeministri i Kosovës Albin Kurti ka dhënë një intervistë për një gazetë holandeze ku ka zbuluar edhe detaje të padëgjuara më parë nga situate e tensionuar në Veri.
Ai tha se njerëzit që qëndruan në barrikada u sollën me autobusë nga Serbia.
Por më shqetësuese sipas kreut të qeverisë së Kosovës është fakti se ndër ta kishte edhe persona të maskuar të “Brigadës së Veriut”, “Grupit Wagner” dhe “Ujqërit e Natës”.
Kurti theksoi se mund ta provojë me foto e video këtë informacion, duke thënë se materialet i janë dorëzuar tashmë prokurorisë.
“Njerëzit po sillen me autobusë nga Serbia për të udhëhequr barrikadat. Ne kemi prova se këta janë njerëz të maskuar me shenja të milicisë ruse Wagner, Ujqërit e Natës (një bandë ruse motoçikletash besnike ndaj Putinit) dhe të ashtuquajturës Brigadë e Veriut”, ka thënë Kurti për NRC, ndërsa ka shtuar se nuk mund t’i publikojë këto prova meqë “pozicioni nga i cili janë marrë fotot dhe videot mund të tradhtojë burimet tona”.
