Zëvendësuesi i ish-deputetit Alfred Rrushaj në Kuvendin e Shqipërisë, Petrit Doda, ka zgjedhur të mos regjistrohet si pjesëtar i grupit parlamentar të Partisë Demokratike, edhe pse në zgjedhje ishte renditur i 32 në listën e kësaj force politike për qarkun e Tiranës.
Vetë Doda ka konfirmuar për mediat se ai do të jetë deputet i pavarur dhe ka shpjeguar se vendimin ia ka komunikuar sekretarit të përgjithshëm të PD-së, Flamur Noka.
“Vendimin tim ia kam komunikuar edhe Flamur Nokës. Ai ka për qëllim të bëjë riformatim. Unë nuk jam me grupin e Alibeajt, është keqinterpretuar. I kam kolegë dhe i respektoj. Unë u kam thënë “pajtohuni me demokratët të rrëzojmë regjimin e Edi Ramës’”, u shpreh Doda.
Ndër të tjera ai shprehet se në listën e PD ka përfaqësuar partinë Lëvizja e Legalitetit dhe për vendimet e tij është konsultuar edhe me Princ Lekën.
“Unë u futa në listën e kandidatëve me siglën e Legalitetit dhe vendimin e kam konsultuar edhe me Princ Lekën dhe deputetët më të vjetër. Unë shkova në Parlament si deputet i opozitës, demokratët më kanë mbështetur. Ngelem deputet i opozitës, por nuk jam as vegël e Edi Ramës dhe as nuk dua të prish balancat brenda grupeve. Ato duhet të bashkohen dhe të çojmë demokratët në pushtet. Krerët i kanë punët e tyre në terezi. Ndërsa demokratët janë në rrugë të madhe, janë pa punë, pa pensione. Unë nuk dua të prish balancat”, tha Doda.
