Një fregatë ruse e armatosur me raketa hipersonike “Zircon”, të ashtuquajturat të pandalshme po organizon stërvitje luftarake në brigjet e detit të Norvegjisë, teksa lundron drejt Detit të Veriut dhe Britanisë.
Pamjet tregojnë anijen luftarake “Admiral Gorshkov”, e cila mban një nga armët më vdekjeprurëse në botë, duke zmbrapsur sulmet ajrore të simuluara të armikut në kushte të stuhishme në Detin Norvegjez, gjashtë ditë pas misionit të Putin që u pa si sfidë për Perëndimin.
Anija në fjalë është e armatosur me raketa të reja “Zircon” me kapacitet bërthamor 9 Mach, të cilat udhëtojnë me shpejtësi prej afro 7000 mph, si dhe raketa “Kalibr”.
Luftanija po lundron drejt Britanisë dhe pamjet e publikuara sot në TV Zvezda tregojnë se po kryen stërvitje ushtarake.
“Qëllimi i stërvitjes ishte testimi i funksionimit të qarkut të mbrojtjes ajrore, sistemeve të tij, sistemeve të ndriçimit ajror dhe elektronik, sistemeve të zjarrit kundërajror, sistemeve të luftës elektronike të maskimit taktik dhe sistemeve të kontrollit të qarkut të mbrojtjes ajrore”, thuhet në komentin për stërvitjen.
“Detyrat u arritën”, thuhet më tej, teksa nënvizohet se “anija është gati për të zmbrapsur sulmet ajrore nga lartësi dhe drejtime të ndryshme”.
Gorshkov, i cili është në dislokimin e tij të parë, u nis nga Severomorsk javën e kaluar dhe do të kalojë Britaninë përpara se të zbarkojë në Mesdhe, por Moska ende nuk ka zbuluar oraret e sakta ose itinerarin e anijes luftarake.
Ndërkohë, siç pretendon Presidenti rus Vladimir Putin, raketat “Zircon” nuk kanë ekuivalente në botë dhe mbërritja e tyre vjen në një moment shumë të nevojshëm për Rusinë pas pengesave të shumta në Ukrainë, me gati 3,000 trupa të humbur tashmë këtë vit.
Pasi nisi lundrimin në dislokimin e saj të parë javën e kaluar, anija lëshoi menjëherë një raketë provë “Zircon” me aftësi bërthamore në Detin Barents, duke goditur një objektiv 620 milje larg në Detin e Bardhë.
Putini mezi mund ta përmbajë gëzimin e tij duke shpallur lajmin javën e kaluar, ndërsa tha: “Jam i sigurt se armë të tilla të fuqishme do të bëjnë të mundur mbrojtjen e besueshme të Rusisë nga kërcënimet e mundshme të jashtme dhe do të ndihmojnë në sigurimin e interesave kombëtare të vendit tonë“.
