Dy të rinj janë vënë në pranga nga policia e Tiranës dhe një i tretë që bashkëpunonte me ta është shpallur në kërkim, pasi është zbuluar aktiviteti i tyre i palgjishëm në shtjen e drogave të fort.
Sipas uniformave blu, treshja në fjalë kishin shënjestruar baret dhe klubet e natës në kryeqytet si bazë të klientelës së tyre, duke shitur kryesisht drogë të llojit kokainë.
Sakaq, policia i ka sekuestruar grupit të të dyshuarve një sasi kokaine, tabelë policie, 3 automjete, 5 aparate celulare, peshore elektronike dhe shuma parash që dyshohet se janë përfituar nga aktiviteti kriminal.
Njoftimi i policisë:
Seksioni për Hetimin e Narkotikëve në DVP Tiranë, në bashkëpunim me Drejtorinë e Forcës së Posaçme Operacionale në Drejtorinë e Përgjithshme të Policisë së Shtetit, në vijim të hetimeve të kryera me metoda proaktive, nën drejtimin e Prokurorisë së Tiranës, për goditjen e aktivitetit kriminal të shitjes së lëndëve narkotike, kanë organizuar dhe finalizuar operacionin policor të koduar “Clubs”.
Si rezultat i këtij operacioni janë arrestuar në flagrancë shtetasit A. B., 25 vjeç dhe V. Ç., 38 vjeç, si dhe u shpall në kërkim shtetasi E. Ç., 26 vjeç, të tre banues në Tiranë.
Nga hetimet e kryera me metoda proaktive ka rezultuar se këta 3 shtetas kanë bashkëpunuar me njëri-tjetrin, për shpërndarjen e dozave të drogave të forta, në zona të ndryshme të Tiranës, kryesisht në klubet e natës.
Gjatë operacionit janë sekuestruar 400 gramë lëndë e dyshuar narkotike kokaine, 1 tabelë policie, 3 automjete, 5 aparate celulare, 1 peshore elektronike, 76 800 lekë të rinj dhe 175 euro, që dyshohet se janë përfituar nga aktiviteti kriminal i këtyre shtetasve.
Vijon puna për kapjen e shtetasit të shpallur në kërkim.
Materialet i kaluan Prokurorisë pranë Gjykatës së Rrethit Gjyqësor Tiranë, për veprën penale “Prodhimi dhe shitja e narkotikëve”, kryer në bashkëpunim.
