Gjykata vendosi sot masën e sigurisë “arrest në burg” për sanitaren Rozeta Dobi dhe djalin e saj 23-vjeçar Havier Dobi, të cilët organizuan dhe kryen vjedhjen e rreth 700 mijë eurove në cash dhe bizhuteri nga banesa e këshilltares në Kryeministri, Alda Klosi
Sakaq, nënë e bir kanë dalë edhe para hetuesve por ka qenë vetëm pastruesja ajo që ka rrëfyer krimin, duke pranuar se ka grabitur shumën prej 120 mijë eurosh nga shtëpia e Alda Klosit, para të cilat policia i gjeti fillimisht në banesën e Dobit.
Rozeta nuk ka treguar ende përpara hetuesve se ku është grabitur shuma tjetër e majme prej 404 mijë euro që u gjet në tubat e aspirimit të kuzhinës në banesën e saj. Sakaq, Havier Dobi nuk ka dhënë një dëshmi të plotë për shkak të gjendjes së rënduar psikologjike.
Ndërkohë grupi hetimor ka dyshime se pastruesja në fjalë ka vjedhur edhe në banesa të tjera ku punonte, pasi kishte për detyrë pastrimin në mbi 10 banesa në kryeqytet, shumica e të cilave ishin të zyrtarëve të lartë.
Raportohet se 49-vjeçarja ishte nën hetim prej 5 muajsh e dyshuar për vjedhjen e banesës së një shtetaseje shqiptaro-amerikaneje, por ishte denoncimi i Alda Klosit më 15 dhjetor për grabitjen e 120 mijë eurove, ai që vuri në veprim autoritetet.
Nënë e bir kishin inskenuar sikur banesa ishte grabitur nga persona të tjerë, madje as vetë ish-këshilltarja e ish-zv/kryeministrit Arben Ahmetaj nuk ka dyshuar, por janë zbuluar nga kamerat e sigurisë.
Ndërkohë, mësohet se kanë qenë përgjimet në ambientet e komisariatit ato që kanë “fundosur” Rozeta dhe Havier Dobin, të cilët kanë pohuar se kishin lekë të tjera në banesë, në mënyrë të tillë që të dilnin nga burgu.
Nëpërmjet komunikimit me kode midis Rozetës dhe Havier Dobit janë sinjalizuar edhe vendet ku mund të kishin fshehur paratë e tjera.
Rozeta është shprehur se paratë që kishin në banesë, do t’i përdorte për të nxjerrë nga burgu djalin e saj, duke i kërkuar që ai të merrte përsipër fajin.
Ndërkohë që nga shumat e mëdha të parave të gjetura, ka dyshime të forta që Rozeta Dobi në bashkëpunim me djalin e saj të kenë inskenuar dhe vjedhur para dhe aksesorë floriri edhe në banesa të tjera, të cilët dyshohet se mund të jenë emra publikë.
Kjo pasi janë të paktën 4 denoncime nga pronarë të tjerë banesash me thuajse të njëjtën skemë që ka përdorur Rozeta në vjedhjen e apartamentit të Alda Klosit.
