Policia e Roskovecit është alarmuar nga një denoncim i familjes Sakaj nga fshati Suk për zhdukjen e djalit 32-vjeçar prej datës 1 janar.
Ferit Sakaj rezulton i humbur prej 5 ditësh dhe alarmin e kanë dhënë fillimish kunati dhe motra e 32-vjeçarit, të cilët jetojnë prej vitesh si emigrantë në Greqi.
Ata pohojnë se një ditë më parë familjarët e tij kishin shkuar në policinë e Roskovecit ku kanë kryer edhe denoncimin për zhdukjen e të riut.
E ëma e 32-vjeçarit ka pohuar se ai kur ishte larguar i kishte thënë se do shkonte tek motra në Fier por nuk është kthyer më.
“Në datë 05.01.2023, në Komisariatin e Policisë Fier, shtetasja Z. S., 51 vjeçe, banuese në Suk 1, Roskovec, ka kallëzuar se djali i saj, 32 vjeç, është larguar nga banesa në datë 02.01.2023 dhe nuk është kthyer më. Punohet për gjetjen e tij. Materialet do i kalojnë Prokuorisë, për veprime të mëtejshme procedural”, njofton policia.
Familja Sakaj është e goditur nga disa tragjedi, pasi kryefamiljari ka ndërruar jetë duke peshkuar në lumin Seman disa vite më parë, ndërsa djali tjetër vetëm 14 vjeç, Ergis Sakaj u mbyt po në lumin Seman në muajin gusht të vitit 2022.
