Anëtarët e kartelit Sinaloa dhe bashkëpunëtorët e tyre kanë filluar sulme të dhunshme në rajonin që kontrollohet prej tyre duke qëlluar me armë policët dhe ushtarët, të cilët janë duke kryer një operacion të gjerë që pas arrestimit të djalit të “El Chapos”, Ovido Guzman.
Nëntëmbëdhjetë anëtarë të dyshuar të bandës dhe 10 ushtarë kanë mbetur të vdekur në episodet e frikshme të dhunës që kanë “mbërthyer” Meksikën sipas shifrave të fundit të publikuara nga ministri i Mbrojtjes Luis Crescencio Santoval.
Forcat meksikane të sigurisë arrestuan të enjten Ovid, djalin e të burgosurit famëkeq, Joaquin “El Chapo” Guzman. Anëtarët e kartelit Sinaloa dhe bashkëpunëtorët e tyre kanë nisur sulme të dhunshme në rajon, duke qëlluar policë dhe ushtarë, duke djegur automjete dhe duke bllokuar rrugët përgjatë bregut të Paqësorit.
Trazirat u përqendruan në qytetin Culiacan, kryeqyteti i Sinaloa, shtëpia e kartelit të fuqishëm të kryesuar nga “El Chapo” deri në arrestimin e tij në 2016 dhe ekstradimin e tij në SHBA vitin e ardhshëm.
Në konferencën për shtyp të dhënë nga Sandoval, ai tha se në aksionet e djeshme janë arrestuar gjithsej 21 persona dhe nuk ka raportime për vdekje të civilëve.
Sakaq 32-vjeçari Ovidio Guzman u arrestua në orët e para të mëngjesit të së enjtes dhe u transportua me avion në Mexico City, ku po mbahet në një burg të sigurisë maksimale.
Sandoval tha se masat drakoniane të sigurisë do të mbeten në fuqi në Culiacan për të mbrojtur qytetarët. Rreth 1,000 trupa të tjerë pritet të mbërrijnë në qytet sot për të forcuar forcat lokale të sigurisë.
Presidenti meksikan Andres Manuel Lopez Obrador tha se asnjë forcë amerikane nuk ishte e përfshirë në operacionin për arrestimin e Ovid.
Kjo është hera e dytë që Ovido arrestohet, pasi në 2019 u vu përkohësisht në pranga por aksioni përfundoi në poshtërimin e qeverisë së López Obrador, pasi ai operacion provokoi gjithashtu reagime të dhunshme nga anëtarët e kartelit që detyruan qeverinë të lironte djalin e “El Chapos”për të shmangur rrezikun e hakmarrjes nga karteli i Sinaloas ndaj shtetit.
