Mutacioni XBB.1.5, që është lloji më i ri i Covid19 dhe është emërtuar nga Organizata Botërore e Shëndetësisë si “Kraken” po përhapet me shpejtësi në mbarë botën.
“Kraken” është lloji më i transmetueshëm i zbuluar që nga fillimi i pandemisë, sipas drejtuesve të Organizatës Botërore të Shëndetësisë.
Ai tani është përhapur në të paktën 29 vende pasi u shfaq për herë të parë në Nju Jork në tetor. Varianti i ri shkaktoi një rritje të rasteve dhe u ngrit më shpejt në kurbë se çdo variant që kur Omicron përfshiu për herë të parë botën dimrin e kaluar.
Pavarësisht se është jashtëzakonisht infektues, ekspertët këmbëngulin se lloji – një spin-off i Omicron – është po aq i butë sa paraardhësit e tij.
Por pavarësisht kësaj ai ka ngritur shqetësimet se mund të nxisë një valë të re infeksionesh.
Zyrtarët në Mbretërinë e Bashkuar thuhet se shumë shpejt do të nisin këshillim për përdorimin e maskës për fytyrën, nisjen e punës nga shtëpia dhe aplikimin e udhëzimeve për distancimin shoqëror në rast se fluksi i pacientëve nis të rëndojë sistemin shëndetësor NHS.
Sakaq një hartë e krijuar nga eksperti i vizualizimit të të dhënave me bazë në Melburn, Mike Honey bazuar në shifrat nga baza e të dhënave globale të patogjenëve Gisaid, tregon se 28 raste janë regjistruar në Mbretërinë e Bashkuar. Gjurmuesit e viruseve në Mbretërinë e Bashkuar thonë se rreth 4% e rasteve të reja, ose një në 25, janë me XBB.1.5.
Edhe në Gjermani shefat e shëndetësisë shprehën sot shqetësimin për variantin e ri, të cilin ata po e monitorojnë, por deri më tani është zbuluar vetëm një rast në vend.
Ministri i Shëndetësisë Karl Lauterbach tha: “Shpresojmë që ta kalojmë dimrin përpara se një variant i tillë të përhapet mes nesh“.
