Njeriu që bëri të mundur ëndrrat e Vladimir Putinit për eksplorimin e hapësirës me raketa ka vdekur në moshën 74-vjeçare.
Vladimir Nesterov, është viktima e fundit e këtij viti në mesin e elitës ruse dhe zyrtari i katërt i raportuar i vdekur brenda pak ditësh.
Ai ishte pionier i raketës së re, të cilësuar si më e mira në botë nga Kremlini, e quajtur “Angara” dhe ishte ish-drejtori i përgjithshëm i Qendrës Khrunichev, për të cilën Putin shpresonte se do të lehtësonte misionin e parë të drejtuar nga Rusia në Hënë.
Që nga viti 2014, Nesterov është ndjekur nga akuza të vazhdueshme për mashtrim dhe përvetësim.
Autoritetet e akuzuan atë për grumbullimin e më shumë se 57 milionë paundve dhe ai kishte qenë në arrest shtëpiak në pritje të hetimeve të mëtejshme.
Shkaku i vdekjes së Nesterov nuk është zbuluar.
Ai nuk është i vetmi që ka ndërruar jetë kohëve të fundit, pasi Aleksandër Buzakov, drejtori i përgjithshëm i kantiereve të anijeve Admiralty, i ngarkuar me ndërtimin e nëndetëseve të reja të armatosura me raketa vdekjeprurëse “Kalibr”, gjithashtu vdiq papritur në fillim të kësaj jave.
Dhe gjenerali Alexei Maslov, 69 vjeç, ish-komandant i forcave tokësore ruse me lidhje të ngushta me Ukrainën, vdiq ‘papritmas’ ditën e Krishtlindjes, pasi Putini anuloi papritur një udhëtim në ndërmarrjen e tankeve ku ai punonte si ambasador i shitjeve ndërkombëtare.
Buzakov kishte qenë i shëndetshëm një ditë para se të vdiste dhe po ashtu asgjë nuk ishte dëgjuar për problemet shëndetësore të Maslovit. Maslov kishte qenë komandant i përgjithshëm i forcave tokësore ruse midis 2004 dhe 2008.
