Policia e Lushnjes ende nuk ka bërë asnjë reagim zyrtar lidhur me atë që ka ndodhur brenda ambienteve të Bashkisë Lushnje.
Nga burimet mediatike, raportohet se Policia e Lushnjes ka referuar materialet në Prokurori, për të hetuar shkaqet e vdekjes së 58-vjeçares, por vetë nuk ka bërë asnjë deklaratë zyrtare për të sqaruar opinionin publik. Kanë vendosur që të mos bëjnë asnjë koment edhe pse ngjarja ka ndodhur para syve të kryebashkiakes së Lushnjes, Eriselda Sefa.
Mediat së fundmi kanë kontaktuar me zyrtarë të Policisë së Fierit, por ende nuk ka marrë asnjë përgjigje për një informacion zyrtar lidhur me rastin dhe shkakun e fshehjes së informacioneve nga publiku.
Mister mbetet fakti se si Shpresa Cani, 58-vjeçarja e cila vdiq brenda ambienteve të Bashkisë së Lushnjes është nxjerrë nga ambientet e institucionit. Pritet që nga momenti në moment, policia të dalë me një njoftim zyrtar. Ndërkohë që kamerat e sigurisë do të jenë ato që do të bëjnë zbardhjen e plotë të ngjarjes.
58-vjeçarja nga fshati Çinar ndërroi jetë në ambientet e Bashkisë së Lushnjes. Cani, kishte shkuar në zyrat e bashkisë për të pyetur përse iu ishte hequr ndihma ekonomike. Pasi është paraqitur në zyrën e informacionit, ajo është drejtuar Drejtorisë së ndihmës sociale. Viktima ka debatuar ashpër me punonjësit e kësaj zyre rreth faktit të heqjes së emrit nga lista e përkrahjes sociale dhe është nxjerrë me forcë nga kjo zyrë.
Më pas 58-vjeçarja ka kërkuar takim me kryetaren e Bashkisë, Eriselda Sefa dhe është ngjitur në katin e dytë për të takuar kryetaren. Sapo ka kryer takimin ajo është ndier keq dhe është lajmëruar ambulanca e spitalit Lushnje. Pas mbërritjes së ambulancës, mësohet se gruaja kishte ndërruar jetë në vend.
