Një 48-vjeçare nga Fiershegani ka ndërruar jetë këtë të Mërkurë në ambientet e Bashkisë së Lushnjes.
“U referuan materialet në Prokurori për vlerësim, pasi në datën 28.12.2022, në ambientet e bashkisë së Lushnjës, ka humbur jetën shtetasja Sh.C., banuese në Fiershegan. Paraprakisht dyshohet se 48-vjeçarja e ka humbur jetën nga shkaqe natyrale. Materialet procedurale i kaluan Prokurorisë, për veprime të mëtejshme”, thuhet në një njoftim të policisë, që erdhi vetëm pas raportimit të rastit nga media.
Dinamika mbetet e paqartë. Sipas disa raportimeve mediatike, gruaja, e identifikuar si Shpresa Cani, ka pasur përplasje me punonjës të bashkisë. Po ashtu, është raportuar se 45-vjeçares e cila jetonte me të atin, i ishte hequr ndihma ekonomike dhe për këtë arsye kishte shkuar në bashki. Megjithatë, Bashkia e Lushnjes e mohon. Në një njoftim që vjen pas raportimeve mediatike dhe reagimit sipërfaqësor të Policisë lokale lidhur me ngjarjen, Bashkia pretendon se nuk ka pasur përplasje mes Shpresa Canit dhe punonjësve të institucionit. Po ashtu, shprehet se Cani nuk trajtohej fare me ndihmë financiare, por me pension invaliditeti (KEMP).
“Sa i përket ngjarjes, sqarojme se të mërkurën rreth orës 11:00 pranë Zyres së Informacionit është paraqitur shtetesja Shpresa Cani e cila kerkoi takim me Kryetaren e Bashkise Eriselda Sefa. Pak minuta më vonë Kryetarja e Bashkise priti në zyrë të interesuarën e cila ishte e përfshirëqë nga viti 2007 në kategorine PAK si Invalide e plote nga KMCAP me diagnoze Drepanocitoze Hemozigote (semundje gjaku), me pagese mujore 11 915 lekë. Shtetesja Shpresa Cani deklaroi që jetonte vetëm me babain dhe kërkoi nga Bashkia që përvec trajtimit me KEMP nga KMCAP, të gjendej një mundesi për ndihme shtesë për të dhe babain e saj edhe nga ky institucion.
Pasi degjoi shqetësimin e Zonjës Cani, Kryebashkiakja Sefa therriti Drejtoreshen e Shërbimit Social pranë bashkisë Lushnje për të parë mundësinë e ndihmes shtesë nga buxheti bashkiak, përvec pagesës se invaliditetit. Pati një dakortësi që në janar të shihej mundësia për ta futur në skemat e ndihmës nga buxheti bashkiak, mirëpo në një moment Zonja Cani është ndjerë keq. Menjëherë është njoftuar ambulanca dhe shefi i Komisariatit Lushnjë, z.Edvin Ndreu. Ambulanca mbërriti brenda pak minutash në ambjentet e Bashkisë duke transportuar pacienten drejt Spitalit dhe pak caste më vonë mbërritën edhe efektivet e komisariatit Lushnjë”, thuhet në një njoftim të bashkisë.
“Në ambjentet e bashkisë Lushnje dhe aq më pak në zyrën e kryebashkiakes, nuk ka pasur asnjë debat mes Zonjës Cani dhe përfaqësuesve të bashkisë”, thuhet më tej në njoftim.
Familjarë të së ndjerës thanë se në dijeninë e tyre, 48-vjeçarja ka ndërruar jete si pasojë e infarktit, por shtuan se presin përgjigjen përfundimtare nga ekspertiza mjeko-ligjore.
Megjithatë, versionet që japin për arsyen se pse shkoi në bashki janë kontradiktore. “Unë e kam mbesë. Më thanë që i ka rënë infarkt tek bashkia po si i ka rënë nuk e di gjë. Ajo do bënte letrat e KEMP-it, por aty i ra infarkti”, tha tezja e viktimës.
“Ne u habitëm kur na erdhi haberi ka vdekur Shpresa. Ishte vetëm kur iku tek bashkia. Banonte me vllain kunatën. Kur na thanë vdiq aty unë u çmenda, me iku mbesa e re. Policia nuk ka ardhur. Nuk kishte fëmijë, nuk u martua”, u shpreh një grua, e afërm e saj.
“Iku me këmbët e veta dhe erdhi me arkivol. Tek bashkia shkoi për letrat e ndihmës ekonomike. Nga se vuante? Anemike ishte! Kishte disa shqetësime, merrte vazhdimisht gjak, ishte talasemike”, tha një e afërm tjetër.
