Sokol Cikalleshi u rikthehet shtyllave. Nëse kujtojmë shumë pak vite më parë, sulmuesi kaloi një periudhë ku goditi shpeshherë shtyllën e portës kundërshtare apo edhe traversën.
Një “ters” ky që e ndiqte Cikalleshin, edhe pse kavajasi gjithsesi shënonte. Ndërkohë, në ndeshjen e para dy ditëve me klubin e tij arab Al-Khalej, ai ishte një rrezik konstant për mbrojtjen kundërshtare, ndërsa fati nuk ishte me të pasi në dy raste preku sërish shtyllën. Kjo situatë i është dukur si një “deja vu” 32-vjeçarit të Kombëtares, i cili kujton atë kohë me një postim në profilin e tij zyrtar në “Instagram”.
Duke postuar videot e rasteve të dy shtyllave, Cikalleshi i hedh me mbishkrimin: “Si njëherë e një kohë”. Sulmuesi është i huazuar nga klubi turk i Koniasporit në Arabi për një periudhë njëvjeçare dhe më pas do të vendoset nëse do të vazhdojë apo jo. Këtë sezon, deri tani, ai ka arritur që të shënojë dy gola, një në kampionat dhe një në Kupë.
View this post on Instagram
