Një barrikadë e re me tre kamionë është vendosur mëngjesin e sotëm në Lagjen e Boshnjakëve, në afërsi të Shkollës Teknike, në veri të Mitrovicës.
Lagjja e Boshnjakëve është një vendbanim multietnik, ku jetojnë shqiptarë, serbë dhe boshnjakë dhe rruga ku është vendosur barrikada është një prej rrugëve që lidh Mitrovicën e Veriut me atë të Jugut.
Kjo është barrikada e parë e vendosur në qytet dhe e 12-ta që është ngritur prej datës 10 dhjetor kur bandat kriminale serbe vendosën barrikadat e para.
Pengesa e re pamundëson lëvizjen e lirë në qytet, ndërsa deri më tani ishin bllokuar vetëm rrugët magjistrale që çojnë drejt pikëkalimeve kufitare Jarinjë dhe Bërnjak, të cilat lidhin Kosovën dhe Serbinë.
Po ashtu, ka informacione që është ngritur edhe një barrikadë tjetër në vendin e njohur si “Dudin Kërsh” në Zveçan, që pamundëson lëvizjen nga Mitrovica e Jugut në drejtim të Rudarës, Komuna e Zveçanit.
Barrikadat janë ngritur në vazhdimësi nga serbët në pjesën veriore të Kosovës, për të kundërshtuar arrestimin e ish-policit serb, Dejan Pantiç, që u vu në pranga pasi sulmoi anëtarët e Komisionit Qendror të Zgjedhjeve në veri.
Por, vendosja e një barrikade në mes të qytetit të Mitrovicës është një akt i rëndë dhe vjen vetëm pak orë pas takimit që kryeministri i Kosovës Albin Kurti pati me komandantin e KFOR-it dhe shefin e EULEX-it, të cilëve u kërkoi ndërhyrjen e menjëhershme për heqjen e tyre.
