Policia ka reaguar pas raportimeve mediatike se një efektiv policia ka goditur me grusht një qytetar.
Policia sqaron se rreth orës 15:15, është njoftuar salla operative e Komisariatit të Policisë Librazhd, për një konflikt.
Në një njoftim zyrtar, blutë bëjnë me dije se efektivë të policisë, pasi kanë shkuar në vendngjarje, janë kundërshtuar nga një person teksa kërkonin ta shoqëronin, ndërkohë mohojnë se është ushtruar dhunë ndaj tij.
“Shërbimet e Policisë kanë shkuar në adresën e dhënë, ku kanë konstatuar shtetasin K.F. që kishte telefonuar dhe shtetasin Sh.D. që ishte konfliktuar me shtetasin F.K. Në momentin që Patrulla e Përgjithshme do të shoqëronte shtetasin Sh. D., 52 vjeç, banues në Hotolisht, ky shtetas i ka kundërshtuar me forcë punonjësit e Policisë, të cilët kanë kërkuar përforcime dhe më pas e kanë shoqëruar në Komisariat shtetasin Sh.D. Në lidhje me këtë ngjarje po vijojnë veprimet procedurale nga oficeri i Policisë Gjyqësore i Prokurisë pranë Gjykatës së Rrethit Gjyqësor Elbasan”, thuhet në njoftimin e policisë.
