Forcat RENEA dhe FNSH zhvilluan ditën e djeshme një aksion “blic” në Fushë-Kuqe ku kontrolluan banesën e Ervis Martinaj dhe ato të dy xhaxhallarëve të tij për të zbuluar një aresenal armësh, me snajperë, pistoleta, granata dhe veshje e radio policie.
Kaq ka mjaftuar që emri i Vis Martinajt të rikthehet në vëmendje, madje duke shtuar dyshimet për faktin nëse është gjallë apo jo i cilësuari si “mbreti” i lojërave të fatit.
Në mungesë të një përgjigje nga drejtori i policisë Muhamet Rrumbullaku, të cilit kryeministri Edi Rama i la një afat prej 100 ditësh kur mori detyrën që të jepte një përgjigje konkrete për fatin e Vis Martinajt, gazetarët u përpoqën ta merrnin atë prej ministrit të Drejtësisë, Ulsi Manja.
Në përfundim të mbledhjes së fundit të qeverisë për vitin 2022 Manja doli para gazetarëve që të komunikonte vendimet e marrë, por u pyet nëse policia dhe vetë ai kanë frikë nga legjenda e Ervis Martinajt.
Për të hequr përgjegjësinë nga vetja, Manja tha se nuk mund të flasë si prokuror kur është ministër dhe se për çështjen në fjalë i takon sipas tij të shprehet për mediat ministri i Brendshëm, Bledi Çuçi.
Pjesë nga prononcimi:
Pyetje: Këtë pyetje po ia drejtoj ish-prokurorit Manja dhe anëtarit të qeverisë që është përgjegjësi për rendin dhe sigurinë në vend. Si është e mundur që Policia e Shtetit shkon për kontroll në shtëpinë e një të shumëkërkuari vetëm 5 muaj pasi është zhdukur dhe pavarësisht se gjen një arsenal armësh, nuk ka asnjë të shoqëruar, siç do të ndodhte me çdo qytetar të këtij vendi. A ka policia frikë nga legjenda e Ervis Martinajt?
Ulsi Manja: Dua ta nis tek fillimi i pyetjes, t’i iu drejtove prokurorit Manja, por unë jam Ministër i Drejtësisë, i qeverisë Rama. Besoj fort në ndarjen e pushteteve dhe me këtë gjë do të duhet të merren agjencitë ligjzbatuese, kryesisht prokuroria dhe Policia e Shtetit. Edhe për policinë ka një ministër përgjegjës që është kolegu im Çuçi.
