Që prej orëve të para të mëngjesit forca të shumta policie janë duke ushtruar kontrolle në banesën e të shumëkërkuarit të drejtësisë Ervis Martinaj, i cili rezulton i zhdukur që prej muajit gusht të këtij viti.
RENEA, FNSH dhe policia e Lezhës kanë rrethuar të gjithë fshatin Fushë-Kuqe në Kurbin, ndërsa sipas informacioneve kontrollet po zhvillohen në kuadër të hetimeve për zhdukjen e 41-vjeçarit dhe operacionit “Plumbi i Artë”.
Ajo çka bie në sy është se vila e “Mbretit” të lojërave të fatit dhe hapësira prej qindra metra tokë është rrethuar nga një mur i lartë, i përforcuar gjithashtu me hekura me gjemba, si në rrethimet e burgjeve.
Martinaj gjithashtu ka zgjedhur edhe kamera me rezolucion të lartë, ndërsa një portë gjigande është vendosur në hyrje.
Vis Martinaj është shpallur në kërkim pas arrestimit të Nuredin Dumanit i cili dëshmoi se 41-vjeçari do ta paguante 500 mijë euro për të vrarë një nga krerët e Bandës së Durrësit, Endrit Doklen.
I shumëkërkuari i drejtësisë prej kësaj kohe jetonte në arrati, por ruante komunikimet me familjarët e tij, të cilat i shkëputi përfundimisht në mbrëmjen e datës 9 gusht.
Prej asaj kohe Martinaj nuk u bë më i gjallë dhe fati i tij vijon të jetë një mister i madh për drejtësinë shqiptare, ndërsa xhaxhai i tij Faik Martinaj ka akuzuar edhe publikisht kryeministrin Edi Rama për zhdukjen e nipit.
Hera e fundit që ai u pa gjallë ishte 11 gushti, ku Martinaj është filmuar në Durrës pranë një hoteli ku ndodhej me të dashurën dhe efektivin e Operacionales, Jeton Lami.
Ervis Martinaj dyshohet se ka humbur gjurmët në rrugën në drejtim të Shijakut, zonë në të cilën janë kryer disa operacione në muajt e fundit nga FNSH e RENEA, por pa mundur të gjenden gjurmë nga “bossi” i lojërave të fatit.
