Pamjet e aksidentit tragjik të autobusit me turistë grekë që ndodhi në Rumani, janë publikuar nga mediat vendase dhe tregojnë tmerrin që kanë përjetuar udhëtarët.
Si pasojë e përplasjes një 53-vjeçar nga Larisa humbi jetën, ndërsa 24 të tjerë u plagosën.
Në videon e publikuar nga mediat rumune, shihet autobusi teksa i afrohet harkut pa ngadalësuar shpejtësinë dhe shoferi me sa duket vlerësoi se autobusi do të mund të kalonte poshtë tij.
Por treguesi i lartësisë ka goditur pjesën e sipërme të autobusit, duke e ndarë thuajse në dy pjesë atë.
Të hënën në mëngjes, avokati i shoferit argumentoi se klienti i tij “në momentin e fundit duhej të zgjidhte se ku të shkonte”. “Brenda një sekonde iu desh të vendoste. Nuk ishte me shpejtësi”, tha ai.
Avokati tha se shoferi është ndalur disa herë në rrugë, nuk është lodhur dhe se përgjegjësitë bien diku tjetër.
“Ky tunel u rinovua gjatë gjithë verës. Nga shtatori kemi pasur shtatë aksidente. Në të kaluarën aty kalonin pa probleme kamionët dhe autobusët. Kufizuesi i lartësisë ishte shumë i rëndë”, u shpreh ai.
Edhe vetë shoferi i autobusit pohoi se nuk ishte duke ecur me shpejtësi dhe ishte i kujdesshëm.
