Prej orëve të para të mëngjesit të sotëm një operacion policor po zhvillohet në Kurbin, aty ku FNSH e RENEA kanë rrethuar të gjithë fshatin Fushë-Kuqe duke bllokuar hyrjet dhe daljet, ndërkohë që kontrollojnë banesën e të shumëkërkuarit të drejtësisë Ervis Martinaj.
Nga pamjet e siguruara prej mediave shihet se vila e Vis Martinaj është e “fortifikuar” me një mur rrethues prej betoni dhe gardhi metalik sipër tij që e rrethon të gjithë sipërfaqen e tokës, por edhe kamera sigurie e sensorë.
“Mbreti” i lojërave të fatit, i cili nuk dihet ende nëse është i zhdukur, i vrarë apo i rrëmbyer, është siguruar që të blindojë shtëpinë e tij dhe zonën për rreth saj duke u ruajtur nga kundërshtarët në botën e krimit.
Sakaq lidhur me operacionin në fjalë ka folur edhe eksperti i kriminalistikës, Ervin Karamuço. Ai ka deklaruar në një emision televiziv se Vis Martinaj po kërkohet i gjallë dhe se operacioni për gjetjen e tij ka nisur në Vlorë vetëm pak ditë më parë, pasi policia ka dyshime të forta se 41-vjeçari mund të rikthehej në shtëpi për të festuar Krishtlindjen me familjen.
Kjo është edhe arsyeja që ka bërë RENEA-n dhe FNSH të zbarkojnë sot në Fushë-Kuqe, teksa Martinaj prej pas 5 muajsh është zhdukur pa lënë gjurmë.
Karamuço ka theksuar se banesa e Ervis Martinaj, është e fortifikuar, me sensor të shumtë, madje kamera sigurie ka në një perimetër deri tek kryqëzimi i Patokut.
Sipas ekspertit, mund të ketë tunele të lidhura në banesa të ndryshme, pasi një njeri me pushtet në zonë si Martinaj mund të ketë planifikuar shumë mirë planet e arratisjes.
“Po kërkohet për të gjallë. Nuk ka filluar aksioni në Fushë Kuqe por fillimisht në Vlorë. Ka pasur informacion që mund të jetë vendndodhja e mundshëm e Vis Martinajt. Sot janë zhvendosur në Fushë Kuqe. Sot jemi në ditë festash krishtlindjesh. Dhe mundet që personazhe të tilla të bashkohen me familjen. Ka infrastrukturë për t’u vendosur dhe ikur në vende përreth mbi dhe nën tokë. Zona është e monitoruar me kamera me sensor me gjithçka është e ruajtur. Nuk dihet se RENEA ka pasur informacione për këtë teknologji”, tha Karamuço.
Sipas Karamuços ish-efektivi i Forcave Operacionale, Jeton Lami mund të ketë folur dhe treguar shumë për fatin e Ervis Martinajt, pasi ka qenë krahu i djathtë i tij.
“Ajo zonë ka kodin e heshtjes. E respekton në maksimum. Nuk vjen nga zona. Mund të ketë të infiltruar, por nga atje nuk vjen. Nuk i merr dot informacionet thuajse është e pamundur. Ka dyshime të forta se mund të kemi një të penduar që po flet dhe po tregon vendndodhjen e mundshme. Dhe ky mund të jetë ish-oficeri Jeton Lami. Jeton Lami ishte më i afërti për të. Jeton Lami ka folur më shumë. Duhet parë nëse janë apo jo të vërtet. Për të zbuluar apo jo nëse Ervis Martinaj ka vdekur apo është gjallë. Nëse ka shkuar në ambientet e banesës së tij”, deklaroi ai.
