Kreu i PBDNJ-së, Vangjel Dule ka folur pas vizitës së kryeministrit grek Kyriakos Mitsotakis në Himarë. Ai e cilësoi një vizitë historike dhe tha se Mitsotakis dha një mesazh mbështetjeje për pjesëtarët e minoritetit grek.
“Ishte një vizitë historike. Për herë të parë, kryeministri i Greqisë viziton Himarën, Livadhjanë dhe Derviçanin. Është mesazh mbështetjeje për pjesëtarët e minoritetit etnik grek. Së dyti, është mesazh për popullin shqiptar, mesazh i fqinjësisë së mirë, i bashkëpunimit, i mbështetjes së Greqisë në rrugëtimin evropian të Shqipërisë. Është edhe mesazh për të gjithë rajonin. Shqipëria ka çdo arsye për të përforcuar marrëdhëniet mes dy vendeve, për t’i shndërruar të dy vendet në bosht të sigurisë për mbarë rajonin”, tha Dule.
“Besoj se kryeministri grek na dha një mësim të gjithëve: në komunikimin e tij me qytetarët dhe vëmendjen me të cilën i dëgjon ata. Shumë larg standardeve të politikanëve dhe politikës në vendin tonë”, shtoi.
I pyetur nga gazetarët nëse Fredi Bejleri do jetë kandidat i PBDNJ-së për 14 majin, Dule tha se kandidatët do të dalin në të ardhmen.
I pyetur se përse kryebashkiaku i Himarës, Jorgo Goro nuk ishte i pranishëm, Dule deklaroi se ardhja e Mitsotakis është një ngjarje shumë e madhe për t’u eklipsuar nga gjëra shumë të vogla.
