Nga Boldnews.al
Dilesh Nguwaya, ortaku nga Zimbabve i Mirel Mërtitrit (i cili është i përfshirë në aferën 430 milionë eurove të inceneratorëve të Elbasanit, Fierit dhe Tiranës), ka marrë në vendin e tij një çmim për Inovacionin në Biznes.
Çmimi për Nguwaya është akorduar nga Shoqata e Tregtarëve të Integruar të Zimbabvesë dhe i është dorëzuar atij nga ambasadori rus, Nikolai Krasilnikov, që e vlerësoi ortakun e Mërtirit për faktin se i ka treguar botës se vendi i tij është i hapur në biznes.
“Ceremonia e çmimeve ZITA u dekorua nga ambasadori rus në Zimbabve, Nikolai Krasilnikov, i cili përgëzoi organizatorët për njohjen e lojtarëve të ndryshëm, funksioni i të cilëve në ekonomi është të demonstrojnë se Zimbabveja është vërtet e hapur për biznes”, shkruan një nga mediat vendase.
Por çmimi që biznesmeni nga Zimbabve ka marrë lidhet fort me “punën” e tij në rol drejtues në Projektin e Menaxhimit të Mbetjeve Pomona.
Projekti në fjalë është një incinerator, për të cilin Dilesh Nguwaya loboi fort te Presidenti i Zimbabve Emmerson Mnangagwa dhe Ministria e Pushtetit Lokal dhe Punëve Publike për t’ia “dhuruar” kompanisë “Geogenix BV”.
Kompania në fjalë është e regjistruar në Holandë dhe në pronësi të Mirel Mërtirit, i cili është i shpallur në kërkim nga SPAK, pasi akuzohet për korrupsion në lidhje me inceneratorin e Elbasanit.
Gjykata e Posaçme në Shqipëri më 15 nëntor vendosi masën “Arrest me burg në mungesë” për biznesmenin e incineratorëve Mirel Mërtiri, duke bërë që ai t’i shtohet numrit të përsonave të dyshuar që kanë abuzuar me incinertorin e Elbasanit.
Sakaq, bashkëjetuesja e Mërtirit, Stela Gugallia është shpallur në kërkim prej disa muajsh ndërkohë që akuzë e re për rastin e Elbasanit.
Ndërkohë, sa i përket inceneratorit në Zimbabve, bëhet fjalë për një projekt korruptiv dhe abuzimi me tenderat publike që parashikohet të ngrihet në qytetin e Harare dhe kap vlerën e 344 milionë dollarëve amerikanë që do të investohen për djegien e mbeturinave.
Në Zimbabve, “Geogenix” përfaqësohet pikërisht nga Dilesh Nguwaya, një partner biznesi i djemve binjakë të Presidentit Emmerson Mnangagwa, Sean dhe Collins.
Nguwaya disa herë ka qenë i arrestuar për mashtrim dhe korrupsion.
Duke folur pas marrjes së çmimit, Nguwaya tha: “Shfaqja e shkëlqyer, që ndryshon lojën e menaxhimit të ri të mbetjeve në do të ndryshojë pamjen e ofrimit të shërbimeve publike në vend. Projekti është rezultat i hapjes së Qeverisë ndaj inovacioneve. Prandaj, ky çmim nuk është i imi si individ, por është një shenjë e veçantë e pranishme përmes meje në lidhje me një axhendë më të gjerë që “Geo Pomona” po promovon në përputhje me kauzën vizionare të Republikës së Dytë në krijimin e një ekonomie me të ardhura të klasës së mesme e të lartë deri në vitin 2030”.
Por ai nuk u ndal me kaq, pasi çmimin ia ka dedikuar edhe ekipit që ka marrë përsipër ndërtimin e inceneratorit Pomona, pra indirekt mikut të tij nga Shqipëria Mirel Mërtiri, i cili me kompaninë “Geogenix” më 7 Mars të 2022 firmosi me Bashkinë e Harare marrëveshjen për koncesionin e djegies së mbetjeve.
Konçesioni njëjtë si në skemën e përdorur në Shqipëri, i jep të drejtën “Geogenix” të projektojë, ndërtojë dhe të marr përsipër funksionimin e objektit të menaxhimit të mbetjeve në Harare Pomona dhe termocentralit Waste to Energy.
“Unë gjithashtu ia dedikoj këtë çmim pjesës tjetër të ekipit tim që ka parë Geo Pomona Waste Management të mbijetojë shanset për të ofruar një shërbim një herë në jetë për njerëzit e Zimbabve. Çmimi është një motivim në kohë”, tha ndër të tjera Nguwaya.
Por siç mediat në Zimbabve kanë denoncuar në vijueshmëri, qyteti i Harares nuk ka kapacitetin për të përmbushur detyrimet e kontratës me “Geogenix” të Mirel Mërtirit dhe duket se koncesioni për inceneratorin është një kurth borxhi i pazgjidhshëm që do të gllabërojë fondet publike, ashtu siç po ndodh aktualisht me tre kontratat për inceneratorët që ka firmosur qeveria shqiptare me Mirel Mërtirin dhe Klodian Zoton./ Burimi: Zimeye.net
