Në media është publikuar një video e filmuar në dhomat e zhveshjes së kombëtares së Francës në pushimin pas ’45 minutave lojë, në finale përballë Argjentinës.
Didier Deschamps kishte bërë dy zëvendësime para përfundimit të pjesës së parë duke nxjerrë jashtë Oliver Giroud dhe Ousmane Dembele për t’i bërë shembull pasi performanca e tyre ishte për të “vënë duart në kokë”.
Gjendja e “Gjelave” ishte e mjerueshme në fushë dhe në 45 minuta nuk rrezikuan asnjëherë portën e Emiliano Martinez.
Kjo duket se ka reflektuar te Deschamps, i cili i acaruar dhe nervoz ka shpërthyer para lojëtarëve të tij, në tentativën për t’i motivuar që të kthejnë rezultatin 2-0 në pjesën e dytë.
Didier Deschamps à la mi-temps de Argentine-France :
« Vous savez la différence entre nous et eux ? C’est qu’eux jouent une put*** de finale alors que nous on ne la joue pas ! » 🥶 pic.twitter.com/Nj1KiMo2En
— 92%🧃 (@Neymarinho92i) December 19, 2022
Në pamjet e publikuara nga TF1Deschamps dëgjohet të thotë: “Djema, do t’ju them pa u inatosur. A e dini cili ishte ndryshimi? Është se ata, përballë nesh, po luajnë një finale të Kupës së Botës! Dhe ne nuk po e luajmë”.
Më pas tekniku francez përplas me forcë dorën në tavolinë për të zbrazur frustrimin e tij, ndërsa nuk dëgjohet asnjë reagim nga Mbappe me shokë.
Reagimi në fushë do të vinte, por vetëm në dhjetë minutat e fundit, kur Franca barazoi rezultatin (2-2) madje për pak e fitoi finalen.
Francezët në fund humbën ndeshjen me penallti.
