Festa për fitoren në finale e Kupës së Botës nuk ka shkuar ashtu siç duhej për një tifoz argjentinas, që raportohet se është mbytur për vdekje kur flamuri të cilin e kishte mbështjellë rreth shpatullave, i ngeci në gomën e pasme të motoçikletës së tij.
Sebastian Oscar Maciel (22 vjeç) vdiq menjëherë pasi e privoi aksidentalisht veten nga oksigjeni.
Ai u rrëzua në tokë ndërsa festonte triumfin e Argjentinës në qytetin Bahia Blanca në provincën e Buenos Aires, rreth 400 milje në jug të kryeqytetit argjentinas.
Sebastian lëvizte me një motoçikletë Honda XR 150ç, e cila i mori dhe jetën.
“Ai duket se ka vdekur kur një flamur argjentinas që mbante të lidhur në qafë si pelerinë, u kap në njërën nga rrotat e motoçikletës dhe e mbyti për vdekje. Dëshmitarë të ndryshëm e panë atë të rrëzuar në tokë dhe kuptuan se ai e kishte flamurin në qafë”, tha një burim nga policia për median lokale.
Hetimi është në vazhdim, por hipoteza fillestare është se ai ka vdekur nga asfiksia.
Argjentinasit anembanë botës festuan në rrugë pas fitores emocionuese të kombit të tyre me penallti në finalen e Kupës së Botës kundër Francës të dielën.
Më shumë se një milion njerëz u mblodhën rreth monumentit ikonik të Obeliskut në Buenos Aires.
