Një incident ka ndodhur në Komisariatin e Policisë së Elbasanit, pasditen e kësaj të Shtune. Siç duket edhe në pamje, murit rrethues të komisariatit i është vënë flaka, në pjesën ku ndodhet dritarja e ankesave të qytetarëve.

Në këto momente, sipas burimeve policore, dy efektivë policie kanë qenë të pranishëm në godinë, megjithatë nuk raportohet për të lënduar. Zjarri është vendosur nga një i ri i identifikuar si Aurel Latifi, 32-vjeç.  Ky i fundit, pas aktit, është ndaluar nga policia.

Ngjarja

Sipas bluve, ngjarja ka ndodhur rreth ores 18.30. Policia bën me dije se 32-vjeçari, lindur e banues në Elbasan, ne lagjen “Dyli Haxhire“, ka shkuar te zyra e informacionit me nje shishe benzinë në dorë. E ka hedhur lëndë djegëse drejt dritares dhe i ka vënë flakën.

Më tej, është larguar me vrap. Nga efektivët është fikur zjarri  si dhe është ndaluar autori.

Policia bën me dije se ky shtetas dyshohet të ketë probleme me shëndetin mendor. Po ashtu, bëhet me dije se ai sapo është kthyer nga emigracioni në Francë.

Ndaj të riut është ngritur akuza per vepren penale “Shkaterrim i prones me zjarr”.