Gjashtë oficerë të “The Metropolitan Police” në Londër nuk e kishin menduar se loja me topa bore pas reshjeve të dendura që përfshin kryeqytetin britanik në fillim të kësaj jave, mund t’i kushtonte vendin e tyre të punës.
Problemet për grupin e oficerëve filluan pasi në rrjet u publikua një video, ku ata shihen duke luajtur me topa bore dhe e gjithë skena është filmuar gjatë kohës që duhet të ishin në detyrë, në orarin zyrtar të punës.
Skena është filmuar pranë stacionit të policisë “Stoke Newington”, nga stafi në Kishën e Shën Palit në perëndim të Hackney të hënën pasdite, kur kryeqyteti u mbulua nga bora.
Efektivët ishin duke shijuar momentin argëtues mes tyre, por duket se aventura zgjati shumë pak pasi ata janë shoqëruar në Policinë Metropolitane, pas një denoncimi anonim.
Klipi prej 30 sekondash tregon gjashtë oficerë të uniformuar duke zbritur nga një furgon policie. Oficerët u kritikuan se nuk ‘vepruan profesionalisht’ teksa mbanin veshur uniformën.
Në pamjet, dy oficere femra mund të shihen duke shkëmbyer topa bore dhe duke ndjekur njëra-tjetrën nëpër park. Dy oficerë meshkuj më pas bashkohen, me njëri që gjuan një top bore që u kap nga tjetri. Oficeri më pas hedh “predhën e akullt” në drejtim të një oficeri të pestë që po përgatiste një “raketë” më të madhe.
Disa vendas kritikuan oficerët pasi e panë filmin në internet, por Kisha më vonë e fshiu postimin në Twitter pas polemikave.
“Një anëtar i publikut raportoi videon tonë në The Met dhe ka kërkuar “masë disiplinore”. Ne e kemi fshirë tweet-in. Megjithatë, disa anëtarë të publikut kritikuan ata që raportuan oficerët te eprorët e tyre”, tha një zëdhënës i kishës.
