Nuk ka qenë aspak e qetë mbrëmja e djeshme në Veri të Kosovës, aty ku serbët të maskuar kanë ngritur barrikada, duke bllokuar rrugët lidhëse me doganat e gjithashtu kanë ngritur çadra për të qëndruar zgjuar deri në orët e para të mëngjesit.
Sikur të mos mjaftonin barrikadat, janë dëgjuar thuajse në të gjitha komunat e Veriut shpërthime e të shtëna armësh, që kanë lënë të plagosur edhe një efektiv policie.
Dy shpërthime të fuqishme u dëgjuan rreth orës 1:30 pas mesnate dhe 03:00 pranë zonës së Zveçanit. Sakaq, në Zubin Potok ka pasur të shtëna armësh.
Barrikadat janë përforcuar gjatë natës me makineri të rënda, më tepër në fshatrat Soqanicë dhe Rudare dhe pranë tyre janë stacionuar persona të panjohur dhe të armatosur të cilët kanë hyrë nga Serbia.
Ekipet e mediave janë penguar që të fotografojnë ose raportojnë për ngjarjen, teksa gazetarët e KosovaPress rreth orës 5:00 të mëngjesit pranë zonës së Rudares janë ndjekur nga personat e maaskuar, që i kanë sharë dhe goditur me gurë.
Ndërkohë, pjesëtarë të Policisë së Kosovës vazhdojnë të jenë prezentë nëpër lagjet e banuara me popullatë të përzier në Veri, duke ruajtur qetësinë dhe rendin publik, si dhe duke ofruar siguri për të gjithë banorët pa dallim.
Por me një deklarata të dhënë në orët e para të mëngjesit të sotëm, Serbia ka menduar t’i hedhë benzinë zjarrit.
Ishte shefi i zyrës për Kosovën në Qeverinë e Serbisë, Petar Petkoviç që ka akuzuar kryeministrin Albin Kurti se është “i vetmi që dëshiron konflikte dhe luftë” dhe se “Beogradi dhe populli serb dëshirojnë paqe dhe gjithmonë insistojnë në paqe”.
“Populli serb është ngopur me terrorin e Kurtit dhe nuk do të durojmë më, populli serb do të përgjigjet me gjithë çka ka kundër agresionit”, ka thënë ai përmes një postimi në Facebook.
