Në një kohë kur Presidentja e Kosovës Vjosa Osmani ka thirrur në takim krerët e partive politike, për të diskutuar lidhur me situatën e krijuar javën e fundit me shpërthime dhe sulme ndaj policisë të regjistruara thuajse çdo natë në Mitrovicë, Leposaviq e Zveçan, tensionet në Veri të vendit janë shtuar.
Nga raportimet e mediave kosovare, rezulton se serbët kanë nisur të ngrejnë barrikada në zonat e banuara prej tyre, duke bllokuar rrugët në Rudarë, komunën e Zveçanit, si dhe në Leposaviq.
Po ashtu, në Mitrovicën e Veriut dhe në Rudarë janë dëgjuar sirenat e alarmit, ndërsa dhjëtëra ambulance janë rreshtuar në një prej barrikadave të ngritura në rrugë.
Gjithashtu bëhet me dije se pranë barrikadave janë stacionuar qytetarë serbë, burra dhe gra të maskuar.
Arsyeja e këtyre grumbullimeve ende nuk është bërë e ditur, por ka dyshime se kjo vjen pas arrestimit të Dejan Pantiç. Ishte shefi i Zyrës për Kosovën në Beograd, Petar Petkoviç ai që ka deklaruar se në Jarinjë sot është arrestuar Dejan Pantiç, ish pjesëtar i Policisë së Kosovës.
Ndërkohë mbrëmjen e djeshme gjakrat kanë qenë të ndezur në Veri, teksa shpërthime u regjistruan gjatë natës. Një shpërthim i fuqishëm ndodhi pas orës 23:00 të mbrëmjes në Mitrovicë, ndërsa njëri prej tyre u dëgjua në lagjen “Tri Rrokaqiejt”.
Për këtë situatë të tensionuar ka reaguar edhe Departamenti Amerikan i Shtetit, ku në një reagim për Zërin e Amerikës, një zëdhënës i DASH dënoi sulmet. DASH i ka bërë thirrje sërish Kosovës dhe Serbisë që të ulen në dialog dhe të shmangin çdo përshkallëzim të mëtejshëm të tensioneve.
“Përdorimi i eksplozivëve nuk është kurrë një metodë e pranueshme proteste dhe rrezikon jetën e njerëzve të pafajshëm. Shtetet e Bashkuara vazhdojnë t’i bëjnë thirrje Kosovës dhe Serbisë që të ushtrojnë përmbajtje dhe të shmangin çdo veprim apo deklaratë që do të përshkallëzonte më tej tensionet”, tha zëdhënësi për VOA.
Nga ana tjetër, KQZ ka nisur përgatitjet për zgjedhjet, duke thënë se nuk është në kompetencën e saj për të marrë vendimin nëse do të shtyhen zgjedhjet.
